Zaninah Man City leh Spurs inlan dawn
Premier League top 3-ah Manchester City leh Tottenham Hotspur te lang rih lo mah se League Cup final-a inhmachhawn tur Pep Guardiola leh Jose Mourinho hote hi champion rinkai zingah an la tel.
Man City hian zanin dar 11:30-ah Brighton & Hove Albion an mikhual ang a, Tottenham Hotspur-in zanin dar 1:45-ah Fulham an mikhual ve bawk ang. Brighton leh Fulham te erawh relegate thei zinga mi an ni a, zanina point khat lek an hlawh chhuak a nih pawhin result ṭha chung chuang a ni ang.
City an vul ṭan
Manchester City hi an match hnuhnung paruk thlir let chuan champion ngei turah an ngaih theih hial. Pep Guardiola hote hian League Cup-ah harsatna nei loin Arsenal leh Manchester United an hneh a, Premier League-ah awlsam takin Chelsea 3-1 in an hneh bawk.
Man City tan thu lawmawm chu defender John Stones a khel ṭha leh ṭan a, defender thar Ruben Dias nen an inkawp rem avangin tlarhnung a phui ṭha. Match hnuhnung 10-ah goal thum chauh an chhuah.
Pep-a hote hian hote hi league-ah panganaah awm mek mah se champion lai Liverpool nen an inthlauhna hi point li chauh a ni a. Man City hian Brighton, Crystal Palace, Aston Villa, West Brom, Sheffield United leh Burnley te an tum chho dawn a, match ruk khelh turah hian point 18 hmuh theih aṭangin point 18 an hmuh mai a rinawm hle.
Spurs hi...
Tottenham erawh a zawn zata Liverpool leh Leicester City te an hneh loh avangin an thawm a reh leh ta deuh a, amaherawhchu league match hnuhnung bera Leeds United 3-0 a an sawp avang te leh League Cup final an luh avangin dah hniam theih an an ni lo.
Spurs tan Fulham laka point thum hmuh ngei a ṭul a, Harry Kane leh Son Heung-min te an khel kawp a nih chuan chak tura ngaih an ni. Chutihrualin Fulham hian league match hnuhnung paliah an khingpuite an chelh vek a, chung zingah Liverpool pawh an tel tih hriat a ṭha.
Fulham hi Covid-19 vangin an buai a, league match an khelh hnuhnun ber chu nikum Boxing Day daih tawh kha a ni. FA Cup-ah erawh kar liam ta Inrinni khan inlanin QPR 2-0 in an hneh a, Spurs hmachhawn hun atana inbuatsaihna hun ṭha tak a ni thei ang.