RG Stadium zan inkhel hmasa berah Aizawl FC-in Chanmari FC an hneh

Mizoram Premier League Season 8 semifinal chu RG Stadium floodlight thar hnuaiah khelh a ni a, Thawhlehni zan inkhelah Aizawl FC-in Isak Vanlalruatfela goal hmangin Chanmari FC 1-0 in an hneh.

Semifinal second leg hi December 11, Nilaini zanah khelh a ni dawn a, inkhel a la tawp lo - chawlh lawk an hmang chauh a ni. Chanmari FC hi minute 90 khelh leh tur atan chauh an inpuahchah theih laiin AFC erawh I League match hnih khel turin nimin khan Aizawl an chhuahsan. Standly Rosario hote hian Goa aṭanga Aizawl an rawn thlen tukah Chanmari FC an hmachhawn a ṭul dawn - inkhel a la tawp lo!

Coach tawnhriat nei ṭha Standly Rosario-a'n an  hmabaka match awmte a chhut uluk a, MPL champion  ngei a duh avangin first leg-ah hnehna chan ngei a duh. Aizawl FC-in Mohun Bagan nen an inkhelh ṭuma starting eleven ngai bawk an hmang.

Amaherawhchu, AFC-in harsatna an nei a, MPL-a goal 10 khung tawh F. Lalremsanga chu document tihfel ngai a neih vangin an chhawr thei lo. Mohun Bagan nen an inkhelh ṭumin Standly-a'n minute 90 hnuah chauh player a thlak ngam a, Chanmari FC nen pawh substitute aṭanga inkhel thlak danglam tur khawpa tawnhriat nei ṭha a kawl lo. Chutih rualin hmabak nei êng tak tak Techi Tatra, Ayush Dev Chhetri leh Vanlalhriatpuia te hmuh tur an awm thung.

Chanmari FC-in inrintawkna tinghing turin hliam an ngah a, an player hming langsar H. Lalmuankima, Godwin Quashiga, Lalremruata leh Lalremruata (Bata) te chu squad-ah an dah thei lo. MPL-a hming langsar MS Dawngliana'n squad chang mah se hliam vangin bul a ṭan thei lo a, harsatna dang vangin Rochhingpuia chhawr theih turin a awm lo bawk.

RG Stadium leh Lammual boruak a inang lo. Mualpui a vawt zawk a, inkhelh ṭan hmain dai a tla tam bawk. Aizawl FC leh Chanmari FC hi an khelh fo tawhna RG Stadium-ah inkhel mah se dai tlak vanga khelmual nal vangin team pahnihin awmze neiin a tir lamah an khel thei lo.

Mohun Bagan nena hmuhnawm taka khel thei Aizawl FC-in player ngai vek hmangin ṭum danga an passing a pha lo. Inkhel ṭan tirhah William Lalnunfela'n hun ṭha  nei nghalin goal-ah a chantir thei lo a, Alfred Kemah Jaryan-a'n chance ṭha zawk nei lehin goal zawnah a pet thei lo.

MPL8-a freekick aṭanga goal thum khung tawh Chanmari player David Lalrinmuana'n a thiam thil lantirna hun nei mah se goal zawna pet a harsat a, first half-ah goal a lut lo.

Aizawl FC coach Standly-a'n Bagan an hmachhawn ṭum ang thoin Alfred Kemah Jaryan chu midfield-ah a pawt let a, captain Alfred leh defender chak ṭha Richard Kassaga-te hmangin I League club-in tlarhnung an tiphui tlat. AFC hian midfield pawh thunun chhoin goal an sual chhuak.

Minute 72-naah vei lam aṭangin Lalramhmunmawia (Tea) chuan ball a vawrhlut a, CFC defender Hmingthanmawia'n tauh pha loin Isak-a'n vawi khat khawihah goal kilah a dah. Thingsulthliah tlangval hian hliam tenau neih avangin ṭum dang pha lo mah se goal pawimawh bik a khung.

Chanmari FC-in goal khungna hun ṭha an nei meuh lo a, chutih rualin Dawngtea luh hnuah an khel a nung. AFC keeper Arema'n an lamah ball a hui lut ṭep a, ITI Veng tlangval hi hliam vangin thlak a ṭul. Keeper tawnhriat nei ṭha Lalawmpuia a rawn lut a, hna harsa thawh tur a nei lo. AFC tlarhnung innghahna Richard chu man of the match-ah thlan a ni.

Chanmari FC manager Lalhmangaiha (Angaiha) chuan, "Goal khat chauha kan chak loh avangin beiseina thar ka neih phah. Aizawl FC tan I League avangin second leg hi a harsa dawn a, keini erawhin khelh tur dang kan neih loh avangin player pawimawh pahnih khat hi an rawn let thei thung dawn. Kan dinhmun hi a duhawm zawk mahin ka hria," tiin Vanglaini a hrilh a, final lut turin a la inringtawk hle.

Aizawl FC coach chuan, "Chak hi a pawimawh ber a, Mohun Bagan nena kan inkhel chau chungin hnehna kan chang. MPL final thlen ngei kan tum a, chutih rualin tunah erawh I League lamah rilru sen phawt a ngai a ni," tiin a sawi a, club ṭantute chungah lawmthu a sawi bawk.