MPL9 Playoff FC Venghnuaiin MPL khel zel dawn

Mizoram Premier League Season 9 Playoff-ah nimin khan FC Venghnuaiin Kanan FC 3-1 in an hneh a, first leg-a an chak tawhna nen belhkhawmin 5-1 in hnehna an chang.

FC Venghnuai hi MPL an khelh hmasak berah pasarihna ni pha chauh mah se first division champion Kanan FC lakah harsatna an tawk lo. Second leg-ah an player pawimawh Vanlalthanga rawn letin bul a ṭan bawk. Minute thumna lekah JH Lianzuala chuan goal hmahruai a khung a, Sihphir Venghlun tlangval hian first leg-ah pawh minute riatna lekah goal hmahruai a khung tawh. 

Rindika Hmar hoten minute 31-naah Isak Vanlalpeka hmangin an khung belh leh a, Kanan FC-in minute thum hnuah Joseph Lalvenhima hmangin siphurh sut ṭhen mah se an hlauthawng lo. Second half-ah Venghnuai chhuanvawr Vanlalthanga'n goal a khung a, Kanan FC tan thawhchhuah ngaihna a awm tawh lo. I Day Football finalist FC Venghnuaiin season tharah MPL an khel leh ang.

Kumina MPL club pasarih Aizawl FC, Mizoram Police, Chhinga Veng, Electric Veng, Chanmari FC leh FC Venghnuai bakah qualifier hmanga tling FC Bethlehem ten season tharah Mizorama football inelna sang ber an khel ang.

1st Leg - December 2 @ RG Stadium

FC Venghnuai 2 - 0 Kanan FC

FCV : JH Lianzuala 8'; Laldampuia 31'

2nd Leg - December 4 @AR Lammual

Kanan FC 1-3 FC Venghnuai

KFC : Joseph Lalvenhima 34'

FCV : JHLianzuala 3'; Isak Vanlalpeka 31'; 

   Vanlalthanga 69'

Aggregate-ah FC Venghnuai 5-1 in an chak