Wenger-a'n Ljungberg a thlawp

Arsene Wenger chuan tun hma lama a lo enkawl tawh Freddie Ljungberg-a'n Arsenal a kaihhruai thei chu a lawmpui thu a sawi a, a player hlui hian mamawhna a nei a nih chuan atan hun a siamsak theih reng thu a sawi.

Gunners hian thla 18 an rawih hnuah manager Unai Emery an ban a, a hmun ruak luah turin assistant coach Ljungberg an ruat lailawk. Ljungberg hian Wenger kaihhruaina hnuaiah 1998-2007 inkar khan khelin Premier League nomawi vawi hnih a chawi.

Kum 70 mi Wenger chuan, "Freddie hi mi ṭha leh tumruh tak mai a ni a, team enkawl hna hi rei tak chhung thawh theih ni se a duhthusam a ni ngei ang. Tawnhriat a nei chho ve dawn chauh a, thlawpna a mamawh dawn hle.

"Ka lak aṭangin puihna emaw min biak rawnna neih a duh a nih chuan atan ka inhawng reng," tiin a player hlui tan a inhawn zau thu a sawi a, hlawhtlinna chang turin a duhsak thu a sawi bawk.

French pachal hi tun hnai khan FIFA global football development hotupa atana ruat thar a ni a, tun season aṭanga Premier League-a an hman ṭan video assistant referee chu ṭha viau mah se a la duhkhawp lo.

Wenger chuan, "Khaw ṭha tak a ni a, thil dik lo tam tak hmuh chhuah nan pawh an hmang ngei mai. Mahse, referee ten an thil tih a dik nge dik lo tih an ennawn ve leh theihna tur siam tel a ngai," tiin khelmual sira VAR monitor dah a ngaih thu a sawi.

Arsene Wenger-a'n a chhuahsan hnuah Arsenal hian dinhmun rem an la rap hlei thei lo. EPL table-ah pakuana dinhmun an luah mek, zanin dar 1:45 hian Emirates Stadium-ah Brighton an mikhual ang.