November 18-ah ISL club hmu dawn

Nilainiah Indian Super League club CEO leh AIFF hruaituten online meeting an nei a, November 18, Thawhlehniah inhmu leh turin thutlukna an siam.

AIFF hruaitute leh ISL club aiawhte hi Football House, New Delhi-ah an inhmu khawm dawn a, AIFF president Kalyan Chaubey chuan, "January 1 - May 31 inkara league khelh chungchang ISL club-te nen kan sawi ho tawh.

"Hemi chungchang bawk hi kan sawi ho leh ang a, ruahman anga engkim a kal a nih chuan, Supreme Court hmaah, November 19 hian kan duhnate hi kan thlen ang," a ti.

Hetihlai hian ISL club leh player-te chuan an buaina chinfel vat a nih theih nan, Supreme Court-ah a hranpaa an duhnate thlen turin ruahmanna an siam bawk.

AIFF leh ISL club-te online meeting-ah khan Mohun Bagan leh East Bengal club aiawhte an tel ve lo a, November 18 inhmuhkhawmah hian, Kolkata club lian pahnih hi an tel ve leh kher ang em, sawi lawk theih a ni lo.