I League club-ten Sports Minister hmu

Indian Super League hma hun a chiang lo a, hetiang boruak karah hian I League club-te hma hun pawh a chiang chuang lo - Indian second division club-te hian Ningani khan Union sports minister Mansukh Mandaviya an hmu.

I League club 14 aṭangin club pasarih aiawh an kal a, Sports Minister chuan an thu thlente uluk takin a lo ngaihthlaksak - he hunah hian Sports Secretary, Joint Secretary leh SAI Director ten Sports Minister hi an ṭawiawm.

Mansukh Mandaviya chuan SAI thuneitute chu he buaina hi lo zirchiang tura hrilh nghalin, AIFF, ISL leh I League official ten thil ṭha zawk a thlen theih nan inbiakna nei se a duh thu a sawi a, hmalak zel a inhuam viau nia sawi a ni.

I League club-te hian AIFF-in meeting neihpui tura a sawmna chu an lo hnar tawh bawk a, AIFF-in chawpchilh taka meeting a ko chawp chu I League club-te hian ṭul an ti lo niin a lang.

Indian football-a second division inelnaah hian Mizo club Aizawl FC leh Chanmari FC pawh an tel a, MPL12 champion Chanmari hi season lo awm tur hi I League an khelh vawi khatna tur a ni.