Silly Point: Eden, hmeichhia & mipa

Kum a liam hnuah India leilungah Test series mumal tak kan hmu leh thei dawn a. October thlaa West Indies an lo mikhual kha chu chak tur hriat chian sa a ni a, chhiar tel lo ang. Tun ṭuma South Africa nen an inkhel tur hi chu inelna tak tak awm turah a ngaih theih.

Nikum lamah Gautam Gambhir leh a hote New Zealand lakah mualpho satliah pawh ni lo, 0-3 a insawp tirin, an mualpho chhe lailet der a nih kha maw. Nimin lamah Eden Garden, Kolkata lamah India leh South Africa ten Test hmasa zawk khelh ṭan a ni.

India-in spinner pali leh fast bowler pahnihin an inrem hep mai a, an spinner pathumte erawh all rounder anga chhal theih an ni thung. Vuak hmasak thlang mikhual Proteas-te run ṭhahnem tak 1st innings-ah an vuakchhuah ngai mah se bul an ṭan ṭha lo a, Jasprit Bumrah ngam loin 159 runs siamin an thi fai vek. Tuna a lan dan chuan West Indies ang thoin Proteas hi India laka zawr thei an ni.

Karleh mai hian tui let hnua a tuk khatna atan India Hmarchhakin Test match a thleng ve dawn a, cricket ngaina tak tak tan chuan rel ticket book lawk a, Guwahati-a zan hnih khat riaka zuk zin pawh a sual lo ang.

Hmeichhia

Mipate min timawitu leh khawvel tifamkimtu chu mipa nak aṭanga siam hmeichhiate hi an ni a. Tun hnaiah India HMEICHHE team-in world champion a ṭum khatna atan an han ni thei a, sawi zui a hlawh hle.

Virat Kohli a lar tluk zetin India cricketer hmeichhia Smriti Mandana leh Jemima Rodrigues te Hamara Desh-ah hian an hming a tiring hrih a. Chumi nghawng kal zelah leh Cricket Association of Mizoram hmasawna rah chu a takin a lo kuhmum ve zel.

Kum tam a ral hmain Mizo hmeichhe Under 19 te chu Plate group champion niin, season tharah chuan Elite division khel turin an inhlap kai ta ngei mai. A va ropui em! Lalruatpuii, Jacinta etc te hi Mizoram khuavelah hian hming lar leh hming hlu an la ni dawn chauh ang tih hi ka ring tlat a ni. Cricket Asst of Mizoram, Under 19 Hmeichhe team & support staff zawng zawngte lawmpuina chibai ka buk a ni.

Mipa

Age group hrang hrang season-a inṭan chho dawn a, local cricket khuh hawn a ni bawk. A professional team Ranji Trophy khel mekah pawh hruaitute duhsaknain team enkawltu zingah ruat te kan han ni ve e.

Cricket ka chawlhsan kum thum liam ta aṭanga a taka team zinga kan tal ṭan leh inkarah hian nasa takin kan player-te professionalism leh thiamnaah hmasawnna ka hmu nghal a. A hma lama hmeichhe team kan sawi ang bawkin, he thu kan buatsaih lai hian Patna khawpuiah Bihar nen final round khel turin, chak zawk zawk Plate group final lut tur inchuhna inkhel hmachhawn turin kan inbuatsaih mek a ni.

Tumpuite kan hneh ngang loh vang ai mah a, khuain min bumro avang te, keimahni tihsual leh thutlukna famkim lo deuh siam vang te, inkhelh laklawh laia player pawimawh inhliam avang tea tun aia dinhmun chhe deuh hlek zawk ding mai zawk kan nihna te hi hma kan sawn tih lan chianna a ni thei awm e.

Ramhlun Venglai tlangval captain Joseph Lalthankhuma'n half century puitling lutuk mai innings han hmuh te, kum 20 leka upa hmabak êng tak Vanrotlinga'n 130 km/hr vela India batsman ṭha ho bouncer hmanga an mut tui lohna rap tura an chhaih buai vel thei te, Champhai tlangval Lalrempuia spinner hlauhawm ber mai a rawn nih chhoh dan te, sawi leh ziah tur hi a va tam em.

Inkhel hnuhnung berah Manipur lakah 1st innings-ah kan tawlhthlu a, kan irhfiak ngei mai. Run 12 chiah target set theiin kan khawsa. Mahse tlawm ngai lo val rual leh mahni inrintawkna nasa kan inkhelh ve laia kan neih meuh loh kha he dressing roomah hian a lo awm tih kei a coach ber hian a takin ka hmu chhuak.

Run 10 pawh an siam hnaiin mi panga kan han vawm hlum ve mai a nih kha. Hnehna chu kan chang ta chiah lo, mah se Mizoram team leh Mizoram cricket hian boruak thar, oxygen ṭha mi a hip lut mek a, kar loah hei aia tlang sang zawk hi an lawn kai zel dawn tih hi chiang takin ka sawi ngam a ni.

I kal zel ang.