Mizo keeper ṭha Tluangpuia a thi

Mizoram goalkeeper ṭha Zothantluanga chu November 13, Nilaini tlai khan cancer natna avangin a thi a, nimin khan a chenna Republic Vengah vui liam a ni.

Tluangpuia hi Mizo goalkeeper ṭha zinga tel phak a ni a, Zonun Sporting Club aṭanga bul ṭanin Lalrin Earthmovers, Power Dept, 3rd Bn. MAP leh Mizoram Police tan a khel a, player pawimawh a ni zel.

Kum bithliah inelna Subroto Cup leh National BC Roy Trophy-ah te Mizoram tan khel tawhin, senior level-ah pawh Santosh Trophy, Dr T Ao Trophy, Bhutan King Cup, Royal Gold Cup leh Sikkim Governor’s Gold Cup-ah te a khel tawh bawk.

Tluangpuia hi goalkeeping a ṭhat bakah ball a pet nat avangin hriat a hlawh a, chanchin ngaihnawm pawh a ngah. Shillong-a NEHU Inter Univ C'ship an neih ṭumah goalkeeper anga kal ni mah se striker a inhliam vangin chawpchilh takin striker-ah dah a ni a, top scorer a ni.

Kum 1996 khan BC Roy Trophy final-ah an tumpui West Bengal striker Chakraborty chu unconscious-in a awm a, goal venhim pawh ngaihtuah loin CPR pein a buaipui a, a nunna chhanhim sak hialin FIFA chuan Fair Play Award leh Rs. 25,000 a hlan.

Mizoram leh club tana nomawi ṭhahnem tak a chawi bakah an veng Republic Veng chu kum 2004 Inter Village Football leh 2005 CYMA Football-ah a champion pui bawk.