World Cup khel tur Norway

Norway-in Erling Haaland leh Alexander Sorloth te goal hnih ve ve khung hmangin Estonia 4-1 in an hneh a, chhiarkawp danin la chiang lo mah se World Cup khel tura chhal theih an ni tawh. Group I-ah Norway hian point 21 an hmu a, Italy aia point thuma an hmuh tam bakah goal difference-a an inthlauh deuh avangin Azzurri tan umphak theih a ni tawh lo.

Haaland-a telna Norway hian World Cup qualifier match sarih an khelhah hnehna an chang vek a, Italy-in Moldova 2-0 in hneh mah se Stale Solbakken-a hote hi dal theih an ni tawh lo. Kum 28 hnuah Norway-in World Cup an khel dawn a, an nghah rih erawh a ngai thung.

Norway hian November 16, Pathianni zan dar 1:15 hian San Siro-ah Italy an hmachhawn dawn a, an inthlauhna hi point thum chauh ni mah se FIFA hnuai inelnaah goal difference dah pawimawh a ni. Haaland-a'n goal 14 zet a khung tawh zarah Norway-in goal 33 an khung tawh a, an goal difference pawh 29 daih a ni.

An elpui Italy goal difference hi 12 a ni a, an inthlauhna hi 17 a ni daih. Chumi awmzia chu Italy tan Norway chunga awm tur chuan goal 17 a chak a ngai tihna a ni a, thil theih a ni lo. Pathianni zanah chhiarkawp dan thlapin World Cup khel turin Norway an tling ang a, Italy tan erawh World Cup khel turin playoff paltlang a ngai thung ang.