World Cup-ah Mbappe telna France

FIFA World Cup 2018 champion France-in Ningani zan khan Ukraine 4-0 in an sawp a, Les Bleus hian match khat khelh hmabak nei chungin World Cup khel turin an tling. Parc des Princes-a inkhelah hian mualneitu tan Kylian Mbappe-a'n goal hnih a khung bakah Michael Olise leh Hugo Ekitike ten goal an khung.

First half-ah goal lut lo mah se second half-ah team ṭha zawk danglamna a lang. Bayern Munich midfielder Olise-a'n penalty hlawh chhuakin Mbappe-a'n pananka hmangin Ukraine keeper Anatoliy Trubin a bum.

Minute 55-naah goal hmasa ber a lut a, hun tawp lamah goal thum a luh belh. Penalty hlawh chhuaktu Olise-a'n minute 76-naah goal hnihna a khung a, hahdamin France an khelh theih phah. Minute 83-naah hnai tak aṭangin Mbappe-a'n goal hnihna a khung a, ram tan goal 55 khung tawhin Olivier Giroud (57) chu goal hnih chiahin a pha tawh lo.

Minute hnih chiah a awm tawh tihin Mbappe-a'n mahni hma sial lo takin Ekitike tan a siamsak a, Liverpool forward-in chak nemnghehna goal a khung. France hi World Cup 2018 champion an ni ringawt lo a, inelna hnuhnung ber finalist an nih avangin WC 2026-ah pawh champion rinkai zinga mi an ni ang.

France hian November 16, Pathianni zanah Azerbaijan an tlawh dawn a, tling tawh mah se chak tho tura ngaih an ni. Groud D inkhel dangah Iceland leh Ukraine te an inkhel dawn a, point sarih ve ve hmuin, ram pahnih hian playoff khel tur an zawng dawn.