Chennaiyin boss thar Owen Coyle

Indian Super League club Chennaiyin chuan coach John Gregory an ban hnuah a thlak tura Owen Coyle an lakluh thu an puang a, Premier League thlenga tawnhriat lo nei tawh coach hi season tawp thleng atan contract an ziahpui. 

Kum 53 mi coach chuan, "Chennaiyin FC ka zawm thei hi ka inchhuang takzet a ni. Kum naupangte nichunga thawnthu ropui tak nei a, ISL nomawi pahnih lai chawi thei club ka zawm thei hi ka lawm hle," a ti. Player a nih laia Bolton Wanderers tan pawha lo khel tawh Owen hian Premier League-ah Burnley leh Bolton pawh a lo enkawl tawh a, Blackburn Rovers thlenga lo kaihruai tawh a nih avangin a tawnhriat ringawt pawh a ṭangkai ang. 

Kum 2009 khan Championship playoff-ah Burnley chu hnehna chanpuiin Premier League a inhlankaipui a, kum 33 hnua a vawi khat nan English top flight football a khelhpui a ni. Club a enkawl hnuhnun ber erawh Ross County a ni a, Scottish Premiership club hi September 2017 khan kum hnih atan zawm mah se March 2018 khan banna a thehlut a, hetihlai hian league table-ah a mawng an luah!

Chennaiyin hian December 9 zanah Jamshedpur an lenchilh dawn a, Coyle enkawlna hnuaia an match hmasa ber tur a nih avangin ngaihven a hlawh khawp ang - match ruk an khelh tawhah vawi khat chiah an la chak a, team 10 telna ISL-ah pakuana an ni mek. Zaninah ISL inkhel pakhat a awm dawn a, dar 7:30 hian Mumbai City chuan Kerala Blasters an mikhual dawn a ni.