England squad a chhah ṭha

Thomas Tuchel-a kaihhruai England-in World Cup khel tura an tlin hnuah Nilaini zan khan Serbia 2-0 in an hneh. Wembley Stadium-a inkhelah Arsenal duo Bukayo Saka leh Eberechi Eze ten goal khat ve ve an khung.

German manager hian bul ṭantu zingah Nottingham Forest midfielder Elliot Anderson leh Aston Villa midfielder Morgan Rogers te a telh a, Tuchel tan World Cup khel tur squad thlan a harsa dawn.

Serbia an hneh ṭumah hian bench aṭangin Jude Bellingham, Phil Foden leh Eze te an lut thei a, an squad a chhah ṭha hle. Liverpool captain hlui Jordan Henderson pawh Brentford tan a khel ṭha a, second half-ah lutin kum 35 mi hi final squad-a tel thei tur zinga mi a ni.

Manchester United duh loh Marcus Rashford pawh Barcelona tan player pawimawh a ni a, Tuchel-a hnuaiah hmun pawimawh chang chhoin, final squad-a a tel lo a nih chuan thilmak a ni tawh zawk ang.