James hoin Lakers an tho chhuak

Los Angeles Lakers chu an match hnuhnung berah chak lo mah se nimin zing khan huaisen takin an tho chhuak a, Western Conference roreltu nih inchuhnaah Denver Nuggets 105-96 in an hneh.

Lakers tan hian Anthony Davis chuan point 25 a neih bakah rebounds vawi 10 lain double-double a nei. Player pawimawh leh rinrawl James-a'n point 25 a nei thung a, American star hian assist vawi kua nei bawkin hnehna an chan theih nan a thawh hlawk lehpek hle.

NBA regular season kal laiah Lakers hian vawi 18 hnehna an chang tling ta chiah a, vawi thum chu an chak lo thung. Tukin zing dar 7:30 hian Utah Jazz nen an inhmachhawn zui leh nghal ang.

Nimin zing inkhel dangah James Harden-a'n point 50 ngawt nei thei mah se Houston Rockets chak nan a tawk zo lo a, inkhel inhnehtawk leh hmuhnawm takah San Antonio Spurs chu 135-133 in an ngam lo.