Ayush captain-na hnuaiah Thathana a inlan

India Under 23 team-in Inrinni tlai khan Thailand nen Thammasat Stadium, Pathum Thani-ah friendly match an khel a, 4-0 in chak lo mah se Dinthar tlangval Ayush Chettri-a'n captain armband hreng lehin, Chennaiyin midfielder Lalrinliana Hnamte leh Ainawn tlangval Lalthankima te an inlan bawk.

Thailand-a khaw pakhat Rangsit-a inkhelah mualneituin inkhel an thunun a; minute 32-na lekah Siraphop Wandee-a'n goal hmahruai a khung hnuah Phon-ek Maneekorn-a'n penalty ṭangin minute 42-naah a khung belh. Half time-ah 2-0 a ni a, second half ṭan chiahah penalty hmu lehin Chaiyaphon Otton-a'n minute 47-naah goal-ah a chantir a, minute 62-naah Thanakrit Chotmuangpak-a'n goal lina a khung leh avangin Blue Colts tan thawhchhuah ngaihna a awm tawh lo.

Naushad Moosa hote hian ball chang tlem deuh mah se counter attack hmangin an nawr let a, captain Ayush pawhin chance ṭha a nei. Goal li luh hnuah Aizawl FC academy chhak Thathana luhtir a ni a, danglamna thlen lo mah se a football chanchina hun pawimawh a ni.

Thathana hian Aizawl FC aṭanga hming chher ṭanin, Kolkata club Kalighat Sports Lovers Association-ah a inchher hriam a, 2023-24 season khan Mizoram Santosh Trophy team-ah telin, semifinal thlen theihna tura player pawimawh a ni. Kum 2024 vek hian Swami Vivekananda U-20 National Football C'ship-ah Mizoram tan captain hna chelhin semifinal a thlenpui a, best player-a thlan a ni bawk.

Kolkata club Mohammedan SC tan a khel mek a, season liam ta khan I League 2-ah Chanmari FC tan khelin I League-a Chanmarians hruai thlengtu zinga mi a ni. Mohammedan SC tan Calcutta Football League-ah a khel ṭha.

Thathana chuan, "Kan duh ang result nei lo mah ila, Pathian zarah naupan lai aṭanga ka lo suangtuah ve ṭhin ram tan ka khel thei ta. Pathian a ropui e," tiin a sawi.

India leh Thailand te hian November 18, Thawhlehni tlai dar 3:30-ah an khel leh dawn. India U23 captain ṭum hnih ni tawh Ayush chuan, "Thailand lakah chak lo chiang deuh mah ila kan inthlauhna a tam lo. Player koh thar an ṭhahnem a, kan la inman lo deuh. Kan inkhelh leh hunah chuan ṭha zawkin kan khel thei tawh ang," tiin Vanglaini a hrilh.

India tana inlante: Dipesh Chauhan (GK) (Mohanraj K 67’), Ronney Willson Kharbudon, Lalrinliana Hnamte, Sumit Sharma (Joseph Justin 67’), Mohammed Aimen (Thoi Singh Huidrom 67’), Korou Singh Thingujam (Lalthankima 67’), Harsh Palande, Ayush Dev Chhetri (C) (Manglenthang Kipgen 76’), Raj Basfore (Yaipharemba Chingkham 46’), Vinith Venkatesh (Vibin Mohanan 46’), Alan Saji (Rahul Raju 46’).