Vawiinah U23 final tem lawkna Mizoram Vs Meghalaya

BCCI hnuaia Men's U-23 State A Trophy-ah vawiin chawhma dar 9:00 hian final lut tawh pahnih Mizoram leh Meghalaya ten Plate group match hnuhnung ber an khel dawn a, final tem lawkna a ni thei ang. Final hi November 19, Nilaini hian IS Bindra Cricket Stadium, Mohali-ah khelh a ni dawn.

Mizoram che ṭha

Mizoram hian match li an khelh tawhah an la chak vek a, November 15, Inrinni khan Arunachal Pradesh 41 runs-a hnehin Plate group final an lut. Ropar, Punjab-a inkhelah hian ṭhumvawrah Arunachal Pradesh an vannei a, vawm hmasak an thlang. Mizoram-in over 50 chhungin 235 runs an siam a, wicket sarih an hloh. Mizoram tan captain Johan Lalbiakkima a che ṭha leh a, ball 140-ah 87 runs a vaw chhuak a, C. Vanlalhruaia'n run 45 (47) thawh bakah Sahil Sharma 36 (61), Nasib Rai 21(20) leh Vanlalpekhlua Zote 15 (16) ten run 10 aia tam an vaw chhuak vek bawk.

Arunachal Pradesh bat hun a thleng a, Mizoram bowler-ten over 47.2-ah vawm out vekin, 194 runs chauh an siam. Mizoram tan Nasib Rai (Bualpui) chuan wicket thum a la a, Lalhmangaihzuala leh Prem Kumar Layak te chuan wicket hnih ve ve lain, Johan Lalbiakkima, Lalduatliana leh Sahil Sharma te'n wicket khat ṭheuh an la bawk.

Engtin zel?

Mizoram hian final lut tawh mah se vawiin hian group match hnuhnung ber an khel dawn a, final-a an hmachhawn tur Meghalaya nen an inkhel dawn. Group match hnuhnung ber hi chu group match hmahruaitu zawnna chauh a ni a, a nghawng a lian tawk lo.

November 19, Nilainia khelh tur final erawh nomawi inchuhna a nih bakah season thara elite group-a kaisang tur zawnna a ni dawn a, a pawimawh dawn. Chutihrualin final-a inrintawkna nei turin vawiina hnehna chan hi a pawimawh ang.

Ni 19 November (Nilaini) hian Meghalaya nen tho final an khel ang a, a chak zawk zawkin Season tharah Elite Group-ah an kaisang ang. Men's U23 State A Trophy hi over 50 hmanga inelna a ni a, kum 23 hnuai lam inelna a ni.