Kir turin Mauricio Pochettino a inpeih

Tottenham  Hotspur-in an ban tak Mauricio Pochettino chu rei tak a ngawih reng hnuah a ṭawng chhuak a, Argentine coach hian club enkawl turin lo kir tura a inpeih thu a sawi. 

Kum 47 mi coach hi Spurs-ah kum nga leh a chanve a cham hnuin ban a ni a, football khawvela coach hlawhtling ber pawl Jose Mourinho chuan a thlak. Pochettino chuan, "Chona phurawm leh club duhawm tak tak min hmuaktu a awm a, Europe-a kir leh ngei hi ka tum a ni," tiin European club ngei enkawl a tum thu a sawi. 

Argentine manager hian Spurs a enkawl chhungin nomawi chawi lo mah se season li chu Premier League-ah top four a nihpui a, season hman zawh takah khan Champions League final an lut bawk. 

Pochettino hian Spurs-in an ban hnuah London khawpui a chhuahsan a, an ram Argentina lamah chawlh hmangin a awm mek. Club enkawl tura a lo kir leh ngei tur thu hi sawi mah se tunah erawh a chawl hahdam mek a, technical area-a hmel hmu turin hun rei tak kan nghah erawh ring suh. 

Poch chuan, "Tottenham-a kum nga leh a chanve hun duhawm tak ka hman hnuah ka thluak sawizawi ka mamawh a, keimah indinthar a, intihphur thar ka mamawh a ni," a ti. Spurs boss hlui chuan, "Ka chunga thil thleng kha pai dam turin hun ka ngah tawk lo a ni," a ti zui a, Premier League club ṭha pawla a din club-in an ban chu a la na hle tih a hriat. 

Poch chuan ban a tawh rual hian a rilruah Argentina a lan nghal thu a sawi a, an rama kirin a rilru a luah lian ber. Player a nih laia Argentina tana vawi 20 inlan tawh Poch chuan, "Ka thutlukna hmasa ber chu Argentina-a lo kir hi a ni. 

"Mahni ram ngeia rawn haw a, ka chhungte leh ṭhiante hmuh kha ka chak a ni. Argentina-a chawlh hahdam a, ni 10 chhung thil dang ngaihtuah loh kha ka duh ber a ni," a ti. Poch hi tun dinhmunah chuan Arsenal, Bayern Munich, Real Madrid leh Manchester United nen an sawizawm ring viau a, Spurs aia club lian ṭhiau tia chhal ngam an ni. 

Southampton boss hlui hi Barcelona nen pawh sawizawm an ni bawk a, Catalan club hmelma Espanyol player leh coach a nih tawh avanga Barca a enkawl ngai loh tur thu lo sawi tawhtu coach hian Lionel Messi kaihhruaina remchang a neih chuan a thusawi a sut hreh ring suh. 

Poch hian Argentina-ah chawlh hmang mek mah se a hma hun tichiang tura Europe a kir vat tur thu a sawi a, Paris Saint-Germain centre back ṭhin hian season tawp hmaa club dang a nei hman a nih pawhin a mak lo ang. 

Season hmasaa London Football Awards Manager of the Year atana thlan Poch chuan, "Ka kum a la tam loh avangin insiamrem ka harsat lo a, ka hmaa chona inchhawp te en turin ka inhawng a ni," a ti. Poch hian duhtu tam tak a nei tih chu a chiang a, a ṭawngkam hi Ole Gunnar Solskjaer, Hansi Flick, Ernesto Valverde leh Zinedine Zidane te ho tan hriat a nuam lo ang. 

Solskjaer hi United-ah a dinhmun a derthawng viau a, Valverde leh Zidane a danglam lo - Flick hian Bayern a enkawl lailawk mek a, Arsenal chuan coach Unai Emery an ban tawh bawk.