Gabriel leh Calafiori te an inhliam

Arsenal-in tun kartawp hian North London derby an khel dawn a, Mikael Arteta tan chanchin hriat nuam lo a awm. Gunners player pawimawh Gabriel leh Riccardo Calafiori te international break-ah an inhliam a, London club tan Premier League-ah hna a harsa sawt ang.

Kum 27 mi Gabriel hi Brazil leh Senegal inkhelh ṭumin minute 65-naah ṭhal (groin) hliam vanga lakchhuah a ni a, a dinhmun tak a la chiang lo. Brazil coach Carlo Ancelotti chuan, "A ṭha lo em? ka hre bik lo. Medical team lamin a dinhmun an zirchian phawt a ngai dawn. Gabriel a inhliam hi pawi kan ti a, a dam leh thuai kan beisei," tiin inkhelh banah a sawi.

Gabriel hi Arsenal-in league-a hma an hruai mekna kawngah player pawimawh a ni a, Gunners hian tun season Premier League-a match 11 aṭangin goal nga chiah an la chhuah. Arsenal hian season bul ṭan ṭha mah se kar liam ta khan kai thar Sunderland nen 2-2 in an inhnehtawk a, Pathianni zan dar 10:00-a an hmelma Tottenham an hmachhawn zawhah Bayern Munich nen Champions League-ah November 26, Nilaini zan dar 1:30-ah an khel dawn. Bayern zawhah Stamford Bridge-ah Chelsea an tlawh leh dawn a, fixtures hautak lai tak a ni.

Arsenal buaina belchhah turin Italy-in hliam vangin defender Riccardo Calafiori chu London lama inenkawl turin an chhuah a, Azzurri-in nizana Norway an hmachhawn ṭumin a inlan tawh lo. Chutihrualin hliam na tak erawh a ni lo. Gattuso chuan,"Calafiori-a'n harsatna nei a, mah se ram tan theihtawp chhuah a inhuam. Kan bulah kar khat a awm a, khelh luihtir thei a ni. Mahse, a khelh luih chuan amah leh Arsenal tan a dik dawn lo," tiin a sawi.

Arsenal hian hliam vangin Martin Odegaard, Gabriel Martinelli, Victor Gyokeres, Noni Madueke leh Kai Havertz te an chân mek a, hmabak a harsa chho dawn. Chutihrualin Gunners hian Premier League-ah match 11 aṭangin point 26 an hmu a, anmahni hnaih bertu Manchester City aiin point liin an hmu tam zawk.