Islam Makhachev a ropui leh ta

Russian fighter lar Islam Makhachev chuan mixed martial arts legend tia chhal theih turin kawng dik a zawh zel a, nimin zing khan UFC welterweight title hlawh chhuak turin, champion lai Jack Della Maddalena chu unanimous decision (50–45, 50–45, 50–45) hmangin a hneh.

Kum 34 mi Makhachev hian UFC welterweight title hlawh chhuakin, lightweight title a kawl sa bawk a, UFC fighter zinga division chi hniha title kawl thei 11-na a ni.

Makhachev chuan, "Nuam ka ti takzet. Insum hram hram tum mah ila, ka hlim lutuk a, harsa ka ti ve thlawt a ni. Jack hi he infiamnaa ṭha ber pawl a ni a, ani hmachhawn tur hian ka inbuatsaih nasa hle.

"Chuvang chuan awlsam tak angin a lang mai chauh zawk a ni," a ti a, Jack a hneh theih chhan chu theihtawp chhuaha a inbuatsaih vang a nih thu a sawi.

Russian fighter hi vawi 29 fight a hmachhawna vawi 28 a chakna chiah niin, vawi khat chiah a la tlawm - UFC-a chak zawn rei ber niin, vawi 16 ngawt a zawnin a chak tawh.

New York khawpuia a hneh tak Jack tan erawh vawi 21 fight a hmachhawna vawi thum a tlawmna niin, vawi 18 a chak tawh thung.