Germany an chak; an la him lo

World Cup qualifier khelh mekah Germany chuan Zirtawpni zan khan Luxembourg chu 2-0 in an hneh a, Newcastle United striker Nick Woltemade chuan goal hnih hi a khung.

Mahse, Germany hi an dinhmun a him lo hle - zanin dar 1:15 hian Slovakia an mikhual dawn a, World Cup khel turin an tlawm a thiang lo.

Slovakia hian Germany chak zan hian Northern Ireland chu 1-0 in an lo hneh ve a, Tomas Bobcek goal hmangin an chak - an goal khung hun hi hun pek belh minute khatna a ni!

Inter Milan centre back hlui Milan Škriniar captain-na hnuaia khel Slovakia hian hnehna an chan avangin Germany nen an point hmuh zat a inang a, zaninah an chak chuan direct-a World Cup khel turin an tling ang.

Slovakia hian Germany nen an intawn hmasakah 2-0 in an lo hneh tawh a, zaninah erawh khualmuala leng tur an nih avangin thawnthu a danglam dawn.

Team pahnih hi an point hmuh zat inang mah se, draw result a awm a nih erawh chuan head-to-head aiah goal difference en a nih avangin, Slovakia aia goal difference nei ṭha zawk Germany an tling ang.

Hetihrual hian Germany leh Slovakia-te pahnih hi a chak lo zawk pawh pahnihna aia hniam an ni thei tawh lo a, hei vang hian playoff kaltlangin World Cup khelh chance an la nei dawn.

Slovakia laka tlawm Northern Ireland hi pathumna ni dawn chiang mah se, Nations League lama an result ṭha avangin playoff khelhna chance an la nei ve leh dawn bawk a ni.