Kazakhstan-in Belgium an chelh!

Belgium-in World Cup ticket nei fel turin Kazakhstan laka chak an mamawh a, mahse, an intawn hmasaka 6-0 ngawta an sawp tawh team hi 1-1 in an inhnehtawkpui!

Inrinni zana inkhelah, mualneitu Kazakhstan hian goal an khung hmasa zawk hial a, kum 17 mi lek Dastan Satpayev chuan Belgium barakhaihin, goal hmahruai a khung.

Belgium hian na takin nawr let mah se, Kazakh goalkeeper Temirlan Anarbekov an ngam lo a, kum 22 mi keeper hian Hans Vanaken, Leandro Trossard leh Charles De Ketelaere te goal khung ngei tur nia lang chu ṭha takin a dansak vek a, Jeremy Doku pawhin uiawm takin chance a hlah.

Mikhual Belgium hian minute 48-naah Vanaken hmangin si phurh an sut a, Club Brugge attacking midfielder hian Timothy Castagne-a siamsak chu goal-ah a chantir - minute 79-naah Belgium hi beiseina dang siamsak zui an ni.

Kazakhstani forward Islam Chesnokov chu Jérémy Doku laka a foul avangin hnawhchhuah a ni a, mahse, Belgium hian player tam zawk an nih chu an chhawr thei chuang lo - hun tawp thlengin goal dang a lut lo a, 1-1 in an inhnehtawk.

Belgium hian match khat chiah khelh tur nei tawhin, pahnihna North Macedonia aiin point hnihin an sang zawk - Thawhlehni zanah chak la nei lo Liechtenstein an hneh chuan an tlang ang.