Potter hnuaiah Sweden tlawm nghal

World Cup qualifier-a chak la nei lo Sweden-in result ṭha zawk beiseiin coach Jon Dahl Tomasson an ban a, beiseina sang tak nen West Ham bân tak Graham Potter la lut mah se, Potter hnuaia an match hmasa berah 4-1 ngawtin an tlawm nghal!

Sweden hian khualmualah Switzerland an lenchilh a, Swiss team tan Breel Embolo chuan minute 12-na lekah goal hmahruai khung mah se, Sweden hian Benjamin Nygren hmangin an chhanglet a, 1-1 a ni.

Mikhual team hian Potter-a hnuaiah beiseina thar an nei hman a, mahse, an beiseina neih chhung erawh a rei lo - Granit Xhaka chuan minute 60-naah penalty hmangin hmahruai nawnna goal a khung a, Dan Ndoye leh Johan Manzambi ten an khung belh bawk.

Swiss team hian match nga aṭanga point 13 neiin, hma an hruai mek a, pahnihna Kosovo aiin point khatin an sang zawk - Thawhlehni zanah ram pahnih hi intawng dawn mah se, goal difference-a an inthlauhna a san avangin Switzerland hi World Cup khel tur anga sawi ngam an ni.

Sweden tan Arsenal striker Viktor Gyökeres chu hliam vangin a inlan thei lo a, Liverpool forward Alexander Isak chu bench aṭangin lut mah se, danglamna a thlen lo.

Potter-a team hian match nga an khelh aṭangin point khat chiah an la nei a, Nations League-a an result avangin playoff kaltlangin beisei an la nei thei thung.