Man City chakna Gabriel Jesus

Premier League champion Manchester City chuan holam taka an nomawi kawl lai hloh mai an tum bik lo. Pep Guardiola naute hian Gabriel Jesus goal hnih hmangin Burnley 4-1 in an sawp a, hmahruaitu Liverpool an thlauhna chu point riatah an sawr zim rih - match khatin an khel hnem thung.

Thawhlehni zan inkhel pakhat zawkah Crystal Palace defender Mamadou Sakho chu minute 19-na lekah hnawhchhuah ni mah se goal an chhuah lo a, second half-a Jeffrey Schlupp goal khat hmangin an mikhual Bournemouth 1-0 in an hneh.

Inelna hrang hranga an mach hnuhnung pangaah Man City hian vawi khat chiah chak ni hmel an hmu a, an elpui Reds chu point 11 zeta phak lo chungin Burnley hi an hmachhawn; chesual leh ni se la chuan nomawi beisei ngam a har tawh viau ang.

Mahse, Turf Moor-ah inkhel an thunun hneh hle, Jesus-a'n an match hnuhnung 11 aṭanga a goal khatna ni turin goal hmahruai a khung a, Brazil international hian second half tir lamah Bernardo Silva-a cross chu a volley lut leh bawk.

Man City tan hian midfielder Rodri chuan yard 20-a hla aṭanga goal thumna a khung bakah substitute Riyad Mahrez-a'n chak nemnghehna a khung. Mualneitu lam tan Robbie Brady chuan kum hnih hnua a legaue goal hmasa ber khung leh mah se mualpho a hliah phak tawh lo.

Point an hloh hnem tawh avangin Manchester City tan nomawi humhim a harsa tawh dawn a, tun ṭuma hnehna an chan hnuah pawh title in la leh thei ang em? tih chu manager Pep Guardioa an zawhna langsar a ni.

Spanish manager chuan, "Ka thu chhiarah chuan 'Nomawi an thlauh tawh,' tih a inziak. Tumah hian hun ṭha min pe ve lo, kan tan beisei tur awm tawh lo angin an ziak, mahse kei chuan ka ring ve lo," tiin tiel takin zawhna a chhang.

Barcelona manager hlui chuan sawi zawmin, "Kan team hi kan ngelnghet ṭha em em a, hei hi kan duh leh tum ber pawh a ni. Liverpool nena kan inkar ngaihtuah chiam chiam hi a fuh ber lo mai thei, chu ai chuan match kan khelh leh tur ngaihtuah a pawimawh zawk," a ti. Inrinni zanah Manchester United an mikhual leh nghal dawn a ni.

Man City hi an elpui Liverpool an ngam loh hnuah Champions League match hnihah an chak zo lo a, league lamah Chelsea hneh leh zauh mah se Newcastle United 2-2 in an inhnehtawkpui; khel ṭha mah se an tlarhnung phui lo vangin point an hloh nasa.

Inkhelh ṭan hmain Pep hian khualmuala Burnley hmachhawn chu a awlsam ngai loh thu a sawi. Spanish manager hian midfield laia rorel turin Kevin de Bruyne chu zalenna a pe a, Belgium international hi an goal hmasa pahnih a luh theih nana tha thawhtu pawimawh a ni.

Striker rinrawl Sergio Aguero hmun ruak luahtu Jesus-a'n a chunga mawhphurhna awm a hlen chhuak a, Brazil international striker hi Man United lakah pawh hmatawng a ni leh dawn. Pep chuan, "A awm hmunah kawlhrawng lehzual turin ka duh, a pawimawh chu rilru puthmang a ni," tiin Jesus chungchang a sawi.

Minute 19-na lekah Crystal Palace defender Mamadou Sakho chu Adam Smith laka a chet dan mawi lo avangin hnawhchhuah a ni a, a hnu lam minute 71 chhung chu Bournemouth-in player tlem zawk ni chungin an khel.

Bournemouth lamin inkhel thunun viau mah se goal an nei thei lo, midfielder Philip Billing leh striker Dominic Solanke te goal khung tur chu Palace keeper Vicente Guaita-a'n a dansak.

Mualneitu Palace lam erawhin an hun ṭha neih hlah loin Schlupp-a goal hmangin point thum an hmu a, league table-ah pangana dinhmun an luah. Chak lo Eddie Howe naute hi an match lehpek palia an hmachhawn tur zingah Liverpool, Chelsea leh Arsenal an awm; a hautak dawn takzet.

 Ngaihnawm

•    Man City hian 1968 hnu lama a vawi khat nan Burnley lakah a zawnin hnehna an chang.

•    Pep Guardiola hnuaiah Man City hian match 36 zet chu goal thum aia tamin hnehna a chang ta a, 2017-16 Premier League chinah record nei ṭha ber an ni.

•    City manager Pep Guardiola hian Sean Dyche a hmachhawn hnuhnung pakuaah chak loh a nei lo, vawi riat chakin ṭum khat an inhnehtawk.

•    Riyad Mahrez-a'n EPL-ah goal 50 a khung tling ta a, African player zingah hetiang zat goal khung thei pakuana chiah a ni. Leicester City tan goal 39 a khung tawh bakah City tan goal 11 a nei tawh.