Bayern-a cham duh Coutinho

Philippe Coutinho chuan Bayern Munich ṭantute tana thu lawmawm a chhak chhuak. Barcelona aṭanga loan hmanga a khelh mekna German club lianah hian a ngheta awm a duh.

Kumin nipui bazar inhawn lai khan Coutinho hian season khat chhung atan Allianz Arena hi a pan a, an inrem danah chuan a loan hun a hman zawh hunah Bayern hian an duh a nih chuan an lei nghet thei ang tih a tel.

Brazil international hi beisei aiin German khawpuiah a inbengbel hma hle, season kal laia league match 12 a khelh tawhah a ṭhiante khung tur vawi thum a siamsak tawh - Champions League lamah assist vawi hnih a nei tawh bawk.

Kum 27 mi Coutinho chuan, 

"A tira kan inrem danah kha chuan thla 12 chhung hun ka hmang phawt ang a, chumi hnuah ka hma hun ka ngaihtuah ang tih kha ka suangtuah dan pawh a ni. "Tunah chuan ka ngaihdan pawh a danglam tawh, he hmunah hian hun rei zawk cham chhunzawm tura awm ka duh a ni," tiin Bundesliga champion tana khelh zel a duh thu a sawi.

Bayern Munich manager lailawk Hansi Flick-a'n team a enkawl chinah Coutinho hi league match vawi khat chiah bul a la ṭantir. Mahse, Liverpool midfielder hlui hian team inthlak danglam lai a nih thu leh hmun nghet chan theih a inbeisei thu a sawi bawk.