Saina-i'n hrileng a kai

Badminton Thailand Open khel tura kal Saina Nehwal chuan Covid-19 a kai tih hmuhchhuah a ni a, inelna a hmachhawn thei dawn lo. Saina bakah hian mipa singles player HS Prannoy pawhin hri leng hi a kai ve bawk.

London Olympic bronze medalist Saina hian January 2 khan inelna tur hmun Bangkok hi a thleng tawh a, player dangte ang bawkin an khung hrang. Nimin khan a match hmasa ber khel tur ni mah se hrileng vangin ni 10 chhung khung hran a ngai leh dawn ta zawk a ni.

Badminton Association of India (BAI) chuan Saina leh Prannoy ten hri an kai thu hi an sawi chiang tawh. Nimin khan Saina-i pasal Parupalli Kashyap pawh coronavirus a kai em tih endik tura hruai a ni a, nimin tlai thleng kha chuan hri a kai awm hriat a ni lo.

BAI general secretary Ajay Singhania chuan, "Player pahnih hi hri an kai tih hriat a nih hnuah damdawi inah hruai an ni a, ni 10 chhung khung hran an ni ang. Parupalli Kashyap pawh a nupui in hri a kai avangin endik a ngai dawn a, inelna aṭangin a inhnukdawk ve bawk," a ti.

Season hmasa khan All England Championship hnu lamah tournament pangngaia khelh theih a ni lo. Kumin nipui lai hian Tokyo Olympic khelh a ni dawn a, ranking sang lo tan chuan

dinhmun siamṭha turin tournament khelh tam a ngai.

Olympic-ah hian world number 16 chin chauh an inlan ṭhin a, world number 20 ni lai Saina tan tournament khelh theih loh hi a uiawm hle. PV Sindhu erawh Thailand Open hi a khel dawn thung.