Final tem lawknaah Mizoram chak lo

BCCI hnuaia Men's U-23 State A Trophy-ah nimin khan Mizoram leh Meghalaya ten Plate group match hnuhnung ber an khel a, Mizoram an vanduai. November 19, Nilaini chawhma dar 9:00-ah state pahnih hian final an khel dawn a, nomawi inchuhna hi a pawimawh zawk.

PCA New Cricket Stadium, New Chandigarh-a inkhelah Meghalaya-in an bat hmasa a, opener Dipankar-a'n thi loin ball 139-ah 101 runs siamin, Ashif Khan-a'n 72 runs a rawn siam ve bawk. Ruahsur vangin over 44 chiah an bat a, 217/2 runs an siam.

VJD method hmangin target chu 220-ah sawn chhoh a ni a, over 44 chauh Mizoramin hun an neih avangin target hi a sang mah mah. Mizoram opener pahnih captain Johan Lalbiakkima (85) leh Sahil Sharma (66) ten bul ṭan ṭha viau mah se thlawptu an nei ṭha lo a, over 41.3-ah 196 runs siamin an thi fai vek.

Meghalaya hi 23 runs-in an chak a, group stage-ah an khingpui hneh vekin hmahruaitu an ni. Mizoramin Meghalaya hneh lo mah se an khingpui dang an hneh vek avangin pahnihna an ni pha dawn lo a, final-ah phuba lak an tum ang. Plate group champion hi season tharah Elite Group-ah an kaisang dawn. Men's U23 State A Trophy hi over 50 hmanga inelna a ni a, kum 23 hnuai lam inelna a ni.