England an chak vek!

World Cup khel turin England an inpeih ta - qualifier match riat an khelhah Three Lions hi an chak vek a, an hahum ri a ring hle! An match tawp berah hian 2-0 in Albania an hneh.

England tan Harry Kane chuan goal hnih a khung a, Bayern Munich striker hian ram tan match 112-ah goal 78 ngawt a khung ta - a ropui rem rem hle.

Three Lions tan hian Jude Bellingham, Jarrod Bowen leh Bukayo Saka te chuan goal khung belhna remchang an nei vek a, mahse, an chance neih hi an chhawr thei lo vek a, 2-0 in an chak.

Inkhelh zawhah thil sawi hlawh tak pakhat a thleng a, Real Madrid midfielder Jude Bellingham chu England boss Thomas Tuchel-a'n a la chhuak a, a aiah Aston Villa midfielder Morgan Rogers a luhtir.

Bellingham hian khelmual a chhuahsan hmain thlak a nih avanga a lawm lohna a lantir a, Tuchel a lawm lo. German coach chuan, "Thil a nihna ang aia sawi hluai ka tum hran lo a, mahse, ka dinna ngaiah ka ding reng - kan chezia hi thil pawimawh tak a ni.

"Kan ṭhiante, lo lut tur chu kan zah tur a ni," a ti a, player lakchhuah turin an lungawi lohna an lantir chu an ṭhiante chunga zah lohna lantirna angah a ngai.

Bellingham hian lakchhuah a nih lai hian yellow card a hmu tawh a, hmuh belh ta se, a tuar tur chu amah a ni. Tuchel chuan, "Thutlukna siam a ngaih chang a awm ṭhin a, chu chu player-in an pawm thiam a ngai.

"Jude-a chet dan ka en let leh ang. A hlim lo tih ka hria a, phulpui viau erawh ka tum lo. Ka thusawiah ka ding nghet a, team kan nih angin kan inzah tawn ang a, kan inngaihven tlang tur a ni. Mi ṭhenkhat lungawi loh avangin kan dinna kan sawh sawn dawn lo," a ti - Bellingham tan ngaihthlak a nuam lo ang.