France tan hna harsa awm lo

France-in Ukraine 4-0 a an hneh avangin World Cup khel turin an tling tawh a, Pathianni zana Azerbaijan an hmachhawn ṭumin Didier Deschamps-a'n a player neih ṭhatte awltir mah se 3-1 in an chak tho. Group D inkhel dangah Ukraine-in Iceland 2-0 in an hneh a, playoff an khel dawn.

Baku-a inkhelah mualneitu Azerbaijan tan Renat Dadashov-a'n minute lina lekah khung mah se Les Bleus-in first half-ah 3-1 in an lehthal. Deschamps-a hote tan Jean-Philippe Mateta leh Maghnes Akliouche ten goal khat ve ve an khung bakah Azerbaijan player Sahruddin Mehemmedeliyev-a'n an lamah a tilut.

France coach Didier Deschamps chuan, "Match tinah goal hnih aia tam hret kan khung thei a, hei hi a ṭha. Mateta-a'n ram tan a vawi hnih nan bul a ṭan a, mawi takin a tauh lut a, kan tan chanchin lawmawm a ni. Ekitike-a'n inrintawkna a ngah a, a la naupang a, a che rang a, thahrui a ngah bawk," tiin tlarhma lamah duh thlan tur pahnih a neih belh thu a sawi.

Les Bleus hian kum 2018 khan FIFA World Cup nomawi an chawi a, 2026 World Cup hi vawi 17 an inlanna tur a ni.