Coach ṭha in mamawh - Matthäus

Germany legend Lothar Matthäus chuan India-in football-ah hma a sawn dawn chuan coach ṭha an mamawh thu a sawi a, "Coach ṭha ber ber hnen aṭanga enkawlna in dawn hunah footballer ṭha in nei ang," a ti!

World Cup 1990-a Germany champion puitu Lothar Matthäus chuan, "India hian footballer ṭha zawk chher tura a mamawh ber chu coach ṭha a ni. Zirtirtu ṭha chuan zirlai ṭha a chher chhuak ṭhin ang hi a ni mai.

"Zirtirtute an thiam loh viau chuan naupang thiam thei tak neih a harsa alawm! In coach neihte zirtir chhawng leh turin, football legend, ex-player leh coach langsar te chah chhuak rawh u.

"Tichuan, chung coach-te chuan player chhuak tharte an lo zirtir ve leh dawn alawm. Heng hi sikul aṭanga bul ṭan ngai a ni," a ti a, a lera ṭhuai chuan awmzia a neih loh thu a sawi.

Kum 1990-a Ballon d'Or dawngtu Matthäus chuan sawi zawmin, "Cape Verde chuan nakkumah World Cup an khel dawn - an ram mipui zat chu nuai nga vel bak an ni hleinem!

"Khawvela mihring tamna ber ram ni siin World Cup in khel phak lo a, hei hi chu a dik thei lo a ni," a ti a, India chuan hmasawn an mamawh thu a sawi.

Lothar Matthäus hi West Bengal-a khelh tur, Bengal Super League-ah ambassador a ni a, hemi avang hian India-ah a rawn zin mek.