Gabriel a tel dawn lo

Brazil-in zanin dar 1:00 hian Decathlon Arena - Stade Pierre Mauroy-ah anmahni ang bawka World Cup khel tura tling tawh Tunisia nen friendly match an khel dawn a, hliam vangin Arsenal defender Gabriel a tel dawn lo.

Kum 27 mi Gabriel hi Senegal nen kar liam ta Inrinnia friendly match an khelh ṭumin a inhliam a, a let hun tur hi a la chiang lo. Senegal hi Arsenal khelmual Emirates Stadium-ah an hmachhawn a, France-ah zin loin London-ah a inenkawl chhunzawm nghal ang.

Tun season-ah Arsenal-in season bul an ṭan ṭha a, Gabriel hian hmun pawimawh a chang. Brazilian defender hi hliam na tak niin a lang lo a, chutihrualin November 23, Pathianni zana Tottenham Hotspur nen an inkhelh ṭumah a inlan a rinawm loh zawk.

Gunners fixtures a hautak chho a, Spurs zawh hian Bayern Munich leh Chelsea te an hmachhawn dawn. Mikel Arteta hote hian match 11 an khelh tawh aṭangin point 26 an hmu a, anmahni hnaih bertu Manchester City aiin point liin an la hmu tam zawk.