Netherlands-in World Cup ticket an la

World Cup qualifier-a an match hnuhnung berah Netherlands chuan 4-0 in Lithuania an sawp a, group inkhel dangah Poland-in 3-2 in Malta hneh ve mah se, Dutch team point hmuh a sang zawk a, World Cup an khel dawn.

Netherlands tan Tijjani Reijnders, Cody Gakpo (penalty), Xavi Simons leh Donyell Malen ten goal khat ṭheuh an khung a, Lithuania lamin a chhanletna tur an neih loh avangin Netherlands an chak chiang.

Hetihlai hian Poland chuan 3-2 in Malta an hneh ve bawk a, FIFA ranking-a 166-na ram lakah harsa taka an chak hram avangin direct-a World Cup khelh phu zawk chu Netherlands an ni tih an pholang.

Poland tan Robert Lewandowski leh Pawel Wszolek ten vawi hnih ngawt hmahruaina goal an khung a, mahse, Malta hian Irvin Cardona leh Teddy Teuma (penalty) hmangin si phurh an sut zo a, minute 85-naa Piotr Zielinski goal hmangin Poland an chak hram - playoff khelh a ngai dawn.

A chiang e

Thawhṭanni zana Netherlands inlan hmain an tlang tur a chiang tawh, tiin a sawi theih a, an tlang lohna tur chuan thilmak tawp khawk a thlen a ngai - Lithuania laka an tlawm a, Poland-in an goal difference 13 zet chu an chinfel a ngai.

A tawi zawnga sawi chuan Dutch team hi chhiarkawp dan chauhin an la tling lo. Lithuania lakah he chhiarkawp dan hi an thaichhe thuai a, minute 16-na lekah Reijnders chuan goal hmahruai khungin, 1-0 a ni der.

Dutch team hian an goal hnihna khung tur erawhin chawlhlawk hman phawt an mamawh a, minute 58-naah Gakpo chuan penalty hmangin a khung. Tottenham Hotspur forward Xavi Simons-a'n khung belhin, Aston Villa forward Donyell Malen chuan solo goal ṭha zet a khung bawk.

Lithuania tan Netherlands an ṭha lutuk hret a, Ronald Koeman-a team hian match riat aṭanga tlawm nei loin World Cup an inpetkai. Kum 2018-a an inpetkai loh hnuah Oranje hian a zawnin World Cup an khel ve leh dawn ta a ni.

Beisei phak lo

Netherlands chak zanah Poland chak ve tho mah se, fan-te beisei ang erawh a ni lo. Dutch team dinhmun ngaihtuah hman loa Malta laka goal surtir tura ngaih team hian goal thum chiah an khung a, goal hnih an la chhuah zui!

Polish team tan Lewy chuan minute 32-naah goal hmahruai khung mah se, Ligue 2 club Saint-Étienne forward Irvin Cardona-a'n si phurh sutna goal a khung - goal dang lut loin chawlhlawk an hmang!

Poland tan forward Wszołek-a'n second half-ah hmahruai nawnna goal khung mah se, Malta tan Teddy Teuma chuan penalty hmangin si phurh a sut leh a, team pahnih hi an inhnehtawk mai dawn niin a lang hman hial.

Mahse, Inter Milan midfielder Zieliński chuan hun tawp nan minute nga chiah a awm tawh tihah Poland chakna goal a khung a, World Cup khel turin tling nghal lo mah se, playoff an la khelh dawn avangin beisei tur an la nei.