Mbappe-a'n PSG sum a ṭhing!

France captain Kylian Mbappe chuan a club hlui Paris St-Germain chu ba a ṭhing a, French club hian pound maktaduai 231.5 an pek a ngaih thu court hnenah a thlen - hetihlai hian PSG chuan an player hlui hi £211mtd an ṭhing ve thung.

Kum 26 mi Mbappe hian PSG chu a hlawh tur, £46.3mtd lai la baah a puh a, contract chungchanga an inhmuh thiam lohna leh club-in an an enkawl dana a lawm loh avanga zângnadawmna sum a phut chu a tel bawk.

Hetihlai hian PSG chuan, kum 2023-a Al Hilal-in £259mtd ngawta Mbappe lei an dilna, Mbappe-a'n a lo hnar avangin French forward hi sum chawi turin an ti ve thung a ni!

Saudi club hausa Al Hilal hian khatihlai khan Mbappe biak phalna PSG aṭang hian an hmu a, mahse, amah berin Saudi-a pem turmna a neih loh avangin Al Hilal hotute hi a dawr duh lo.

Mbappe-a'n Al Hilal a biak duh loh hma hian PSG-ah contract thar a ziak duh lo bawk a, hei vanga PSG pawh hian hralh phal an ni. Mahse, Saudi pawh a pan duh loh hnuah French club hian an pre-season tour-ah pawh an telh duh lo a, season ṭanna match hmasa berah pawh inlan loin a awm.

PSG chuan Mbappe hian club sum dinhmun chhe tur ven nan, a contract zawh lama pek tur sum ṭhenkhat chu pek loh a pawm vek niin an sawi a, Mbappe team lam chuan, "Mumang ram mai an sawi a ni," tiin PSG hi an puh thung.

French club chuan, "Mbappe hian a contract-a inziak anga tih loh tam tak a nei a, hei hian na takin club a nghawng a ni. July 2022 - June 2023 inkar, thla 11 zet kha chu he club tana a intiamnate tihlawhtling loin a biru a ni," an ti!

PSG chuan Mbappe-a chunga mawi lo taka che anga puhna chu an pha a, "Paris St-Germain-a kum sarih zet hun a hman chhung zawng khan duat taka enkawl a ni," an ti a, Mbappe-a'n a chunga dik lo taka rorel anga a puhna chu an pha.

Mbappe hian PSG tan 2017-2024 chhung khelin, match 308-ah goal 256 khungsakin, nomawi 15 a chawipui a, a duh ber Champions League nomawi erawh a chhuah hnuah PSG hian an chawi thung!