Tlawm nei loin Croatia an tlang

World Cup qualifier match riat an khelhah Croatia an tlawm lo - an match hnuhnung berah Montenegro chu 3-2 in an hneh a, vawi sarih hnehna an channa chiah niin, vawi khat chu an khingpui an draw.

Croatia hian kar hmasa khan Faroe Islands chu 3-1 a hnehin World Cup khel turin an inpetkai a, an hahdam - hei vang hi a ni mai thei, Montenegro lakah rin loh takin goal hnih an chhuah hmasa!

Mualneitu team tan hian Milutin Osmajic leh Nikola Krstovic ten goal khat ve ve khungin, 2-0 in Montenegro chu hma an hruaipui a, Croatia tan Ivan Perisic (penalty), Kristijan Jakic leh Nikola Vlasic ten an chhanglet.

Hun tawp thlenga goal dang lut loin Croatia an chak a, bench-a hahdamtir Luka Modric pawh hun tawp hnaih lamah luhtir a ni - AC Milan midfielder hi kum 40 mi a ni tawh!

World Cup hnuhnung pahniha final leh semifinal khel thei Croatia chak zanah Czech Republic pawhin 6-0 in Gibraltar an sawp a, David Doudera, Tomás Chorý, Vladimír Coufal, Adam Karabec, Tomás Soucek leh Robin Hranác ten goal khat ṭheuh an khung.

Czech team-in hnehna chang mah se, point ruk ngawtin Croatia an phak lo a, playoff hmangin beisei an la nei thei ang.