Usyk-a'n a kawnghren a kalsan

Khawvela boxing title lian tham pali, WBO, WBA, WBC leh IBF heavyweight title kawltu Oleksandr Usyk chuan a kawnghren kawl lai zinga mi WBO chu a kalsan dawn a, British boxer Fabio Wardley chuan WBO title hi a kawl zui ang.

WBO danah Usyk hi Wardley nen hian title inchuha inhnek tur an ni a, mahse, Usyk hian British boxer hmachhawn lo a, a title kalsan mai chu a thlang ta zawk a ni.

Usyk hian May 2024 khan boxing khawvela kawnghren lian tham pali a awm hnua undisputed champion hmasa ber ni turin Tyson Fury a lo hneh tawh a, July thla khan Daniel Dubois chu Wembley Stadium-ah hnehin, a vawi hnih nan undisputed heavyweight champion a ni nawn.

Mahse, tunah Wardley hmachhawn ai chuan kawnghren kalsan a thlang ta zawk. WBO president Gustavo Olivieri chuan, "WBO division hniha undisputed champion ni thei Oleksandr Usyk hi kan zah em em a, a chungah lawmthu kan sawi bawk.

"Tunlai boxing khawvela sulhnu ropui ber a hnutchhiah a, Usyk leh a team te tan WBO chuan kawng a hawng reng a ni," an ti a - Usyk hian kum 2021 khan Anthony Joshua hnehin, WBO title hi a hlawh chhuak a, vawi li ngawt a hum tawh.

July khan WBO chuan Joseph Parker nen inchuh turin a ti a, mahse, Usyk-a inhliam avangin sawn a ni. Hetihlai hian, thla hmasa khan Wardley chuan rin loh takin Parker hi a hneh a, Usyk-a hmachhawn thei dinhmunah a ding ta daih.

Mahse, Usyk a inlan thei dawn lo a, kum 30 mi Wardley hi WBO title kawltu a ni ta a ni.