MPL5 goal khung tam ber? Sawmfela Vs Dampuia
Mizoram Premier League Season 5-ah league round khelh zawh a ni tawh a, goal lut zat chu goal 133 a ni. Chanmari West captain Laldampuia leh Chanmari FC forward Mal-sawm-fela ten goal 10 ve ve khungin an club khelhna semifinal an hruai thleng a, top scorer tur a la chiang lo.
Tun dinhmunah hian top scorer tihchian tur chu ni se goal khung tam vanga chawimawina dawng tur chu Sawmfela a ni a, Ramhlun South tlangval hian Kawrtethawveng tlangval Dampuia aiin match khatin a khel tlem zawk.
Chanmari West-in league hmahruaitu Bethlehem Veng-thlang nen December 1, Ningani zan hian semifinal hmasa zawk an khel dawn a; December 2, Zirtawpni zanah Chanmari FC-in champion lai Aizawl FC an hmachhawn ve bawk ang.
Sawmfela chu
Malsawmfela hian goal 10 khung tur hian a ke dinglam vawi kua a hmang a, a kei vei lam vawi khat a hmang bawk. Chanmari FC forward hian penalty aṭangin goal li a khung a, MPL5-a penalty pet goal hnem ber a ni.
Ramhlun South tlangval hian Chanmari West FC (3), Aizawl FC (2), Bethlehem VT (2), Chhinga Veng FC (1), Ramhlun North (1) leh Zo United (1) te lamah goal khungin Dinthar FC lamah chiah tun season-ah goal a khung lo.
Sawmfela hi match hmasa bera Dinthar an hmachhawn ṭumin a inlan lo a, a bak match 13-ah inkhel bul ṭan vek-in match thumah chiah a khel tluan lo. Chanmari FC forward Sawmfela hi khelmual chhungah minute 1156 chhung awmin minute 116 danah goal khat zel khung ang a ni.
Dampuia ve thung
Laldampuia hian goal 10 khung turin a ke dinglam vawi riat bakah a lu leh ke vei lam vawi khat ve ve a hmang a, Kawrtethawveng tlangval hian penalty a la pet lo a, freekick
aṭangin goal a khung tawh thung.
Chanmari West captain Dampuia hian Ramhlun North (3), Chanmari FC (2), Chhinga Veng (2), Dinthar (1), Bethlehem VT (1) leh Zo United (1) te lamah goal khungin Aizawl FC lamah chiah goal a khung lo. I League club lamah hian goal khung lo mah se a thawhrah aṭangin AFC defender Lal-
ṭhakima'n an lamah a ti goal.
MPL5 league round-a khel ṭha bera chhal Dampuia hian man of the match chawimawina vawi nga a dawng tawh a, top scorer ni tura a elpui Sawmfela'n vawi khat chiah a la dawng thung. West Warrior captain hian match zawng zawngah in-khel bul a ṭan vek a, inkhel pathumah chiah a khel tluan lo.
Dampuia hian minute 1223 chhung khel tawhin minute 122 danah goal a khung a, West Warrior captain hi Chanmari West mipui tana a hlutna em em chu semifinal an luh theihna turin Chhinga Veng lamah goal hnih a khung.
Top Scorer
MPL1-ah Chanmari FC forward MS Dawngliana'n goal 10 a khung tawh a, hemi ṭum hian Round 14 zawhah season a tawp. MPL2-ah Mizoram Police winger Lalbiakhlua'n goal riat khungin top scorer a ni a, hemi ṭum hian final awm mah se Biaktea khelhna Police-in final an lut lo.
MPL3-ah Police winger Biaktea'n goal kua a khung a, Chanmari FC forward Sawm-fela nen an khung zat a inang. Chanmari FC-in final an luh avangin Ramhlun South tlangvalin match a khel tam zawk a, top scorer nihna chu Keifang tlangval Biaktea hnehah hlan a ni.
MPL4-ah Mizoram Police aṭanga Aizawl FC-in an hawh F. Lalrinpuia'n goal 13 a khung a, amah hnaih bertu Bethlehem VT midfielder K. Lalṭhathanga (Puitea) aiin goal liin a khung tam. Republic Veng tlangval hi MPL season khata goal khung tam ber a la ni.
Goal hnih aia tam khungte
# Hming Club Goals
1 Malsawmfela Chanmari FC 10
2 Laldampuia Chanmari West 10
3 Michael Lalremruata Dinthar FC 8
4 Bright Middleton Mends Aizawl FC 4
5 Lalrammuanpuia (Apuia) Bethlehem VT 4
6 R. Laldanmawia Chanmari West 4
7 Lalkhawpuimawia Chhinga Veng 4
8 PC Zosanga Bethlehem VT 3
9 Lalnunmawia Bethlehem VT 3
10 Lalramchullova Aizawl FC 3
11 Vanlalbiaa Chhangte Chanmari FC 3
12 Vanlallawma Chhinga Veng 3
13 MS Dawngliana Chhinga Veng 3
14 Lalruatpuia Dinthar FC 3
15 Zosangliana Sailo (Chhaia) Ramhlun North 3
16 Lalnunsanga (Tale-a) Zo United 3