Chak kan phu - Emery

Paris Saint-Germain head coach Unai Emery chuan Arsenal nen Cham-pions League match hautak tak an khelh chuan kartawp French Ligue 1 inkhelah nghawng a neih thu a sawi a, chutihrualin Lyon 2-1a an hnehna inkhelah chuan chak phu zawk an nih thu a sawi tel bawk.

Pathianni zan Ligue 1 inkhelah PSG hian Edinson Cavani goal hnih hmangin Lyon 2-1 in an hneh a, league match 14 khelh tawh aṭanga point 32 hmuin AS Monaco nen an inzat a, hmahruaitu Nice nen an inthlauhna chu point khat chiah a ni tawh.

PSG coach Emery chuan, "Lyon kan hma-chhawn a nih chuan na takin min nawr dawn tih kha thil chiang sa a ni a, khami lo veng tur khan keini lam pawh kan lo inzir ve bawk. Min chhiah buai hle mah se inkhel pumpui kan thlir kha chuan hnehna chan phu zawk chu kan ni," tiin a sawi.

Inkhel dangah hma-hruaitu Nice chu Bastia nen 1-1 in an inhnehtawk. He inkhelah hian Nice striker Mario Balotelli chu hliam vangin a inlan thei lo.