United champion beiseina a tawp - Keown

Manchester United chu Pathianni zan khan West Ham nen 1-1 in an inhnehtawk a, Arsenal defender hlui Martin Keown chuan Jose Mourinho hote champion beiseina a tawp thu a sawi.

EFL Cup quarterfinal-ah United hian Hammers hi Nilaini zan hian an mikhual leh nghal dawn a, Paul Pogba leh Maroaune Fellaini ten yellow card vawi ngana an hmuh ve ve avangin midfielder pahnih hi an inlan ve thei lo ang.

Goal khat ve ve

Hammers-in minute hnihna lekah Diafra Sakho hmangin Old Trafford-ah goal an khung nghal a, Zlatan Ibrahimovic hmangin United-in chhanglet mah se goal dangin a zui tawh lo. Tun thla chhunga a vawi hnih nan Jose Mourin­ho chu technical area aṭanga hnawhchhuah a ni a, December 1980 hnua a vawi khat nan Premier League-ah United-in an mualah an khingpuite a zawnin vawi li an draw.

Premier League match 13 khelh tawh aṭangin United-in point 20 an hmu a, hmahruaitu Chelsea aiin point 11 in an pha lo. West Ham-in point 12 chiah hmu ve bawkin relegation zone-a awm Hull City aiin point khat chiahin an hmu tam.

United vanduai

Arsenal defender hlui Martin Keown chuan, "United player-ten an theihna zawng zawng an chhuah a, manager Jose Mourinho hian an vanduai thu a sawi a nih pawhin kei chuan ka dem lo ang. Mourinho hian record ṭha nei mah se tun season-ah erawh ṭum dang a pha lo a, goal hmaah an vanduai bawk avangin champion beiseina hi a tawp a ni," tiin Manchester United chu an vanduai vanga nomawi an dawn a beisei tawh loh thu a sawi.

Keown ngaihdan hi inkhel thlirin a dik niin a lang. United rawlthar duhawm Marcus Rashford-a'n keeper chauh a hmachhawn hnuah a goal khung tur Darren Randolph-a'n a dan sak a, Hammers keeper hian Ibrahimovic leh Lingard goal khung tur ṭha takin a dan sak.

United goal khung chhun erawh a ropui a, minute 21-naa Ibra-a'n goal a khung theih nan United player zawng zawng an inrawlh vek a, vawi 22 zet ball an inpe kual bawk. A tawp khar nan khawvel player manto ber Paul Pogba ball fing chu Swede striker-in chiang zetin a tauh lut.

Substitute Henrikh Mkhitaryan-a'n second half-ah goal ban a pet per a, Lingard-a'n a per chu goal-ah chantir mah se English winger hi a offside avangin goal-ah pawm a ni lo. United-in goal khung tumin vawi 17 attempt an nei a, chung zinga vawi riat chu goal zawnah kal mah se goal khat chiah an khung. West Ham erawhin attempt vawi ruk an nei a, goal zawnah vawi hnih chiah an pet chungin goal an khung tho.

Payet a awm

Old Trafford-ah Hammers
ṭan­tuten chhuang takin 'Payet kan nei' tih hla an sa thei a, he hla sa tur hian French midfielder Dmitri Payet hi a khel ṭha ve bawk.

Minute 1 leh second 30-na lekah Payet-a freekick pet chu Diafra Sakho-a'n a tauh goal nghal a, tun season-a United-in goal an chhuah hma ber ṭum a ni. French midfielder hi hun tawp thlengin United tlarhnung tan a hnawksak a, set piece hmangin United ṭantute a ti thlabar ngun hle.

Hammers hian box chhunga United defender Marcos Rojo handball vangin penalty an beisei a, referee thutlukna erawh United tan lawmna a ni.

Eng nge an sawi?

Manchester United assistant manager Rui Faria chuan, "Pogba chunga foul vanga freekick hmu tur a nih laia yellow card pek a nih avangin Mourinho kha a lawm lo a ni. A awm loh hnuah kei kha boss ka ni chuang lo a, kan tih dan ṭhin angin a thu hnuaiah vek kan la awm a ni," tiin Mourinho hnawhchhuah chungchang a sawi.

Faria chuan sawi chhunzawmin, "Chak turin kan khel ṭha tawk a, player-te khan kan sawi angin an khel a ni. Hrehawm kan tih chhan chu chak kan duh vang a ni a, kan phu ang result kan hmu lo a ni," tiin an vanduai thu a sawi.

West Ham boss Slaven Bilic chuan, "Point hlu tak a ni. Chutih­rualin goal kan khung hnuah Old Trafford a nih avangin kan hlau lutuk deuh a, goal an khung ve hma kha chuan tihsual kan ngah mah mah a ni," tiin an result-ah a lungawi thu a sawi.

Inkhel dang

Everton manager Ronald Koeman chu Premier League-a a hming chherna hmun St Mary's Stadium-ah kir a, amaherawhchu Southampton-in second 41-na leka Charlie Austin goal hmangin Toffees hi 1-0 in an hneh.

Stoke City-in mualneitu Watford lakah inkhel an thunun a, an phu ang ngeiin 1-0 in hnehna an chang. Minute 29-naah Xherdan Shaqiri corner pet chu Charlie Adam-a'n goal ban tauh perin, a per let hi Watford goalkeeper Heurelho Gomes hnung fuhin a goal.