Davis Cup champion Argentina

Argentina chuan Croatia chu an bu zawlah 3-2 a va hnehin a vawi khat nan Davis Cup champion an ni. Hlawhtlinna an chan theih nan Juan Martin del Potro chuan singles match-ah vawi hnih hnehna changin a thawh hlawk hle.

Zirtawpni aṭanga Pa-thianni thleng khan ram leh ram mipa tennis team hmanga inelna Davis Cup hi Zagreb-ah khelh a ni. Best of five hmanga inelna hi neih niin singles match li leh double match khat khelh ṭhin a ni.

Inrinni zan kha chuan a thlengtu Croatia hian 2-1 in hma an la hruai. Pathianni zan in-khel pawimawhah US Open champion tawh pahnih Marin Cilic leh Juan Martin del Potro te inhmachhawnin world number 6 Cilic hian set hmasa pahnih a lak avangin Argentina bei-seina a boa ngaih a ni hman.

Mahse, banrek na vanga hun rei tak a chawlh hnua kumina lokir leh Del Potro a beidawng lo. World number 4 hlui hian darkar li leh minute 53 chhungin 6-7 (4-7), 2-6, 7-5, 6-4, 6-3 in hnehna a chang let a, an ram beiseina a siam sak. Inkhel hnuhnung berah Argentina tlangval Federico Delbonis chuan Ivo Karlovic (Cro) chu 6-3, 6-4, 6-2 a hnehin an ram tennis chanchinah bung thar an ziak.

Kum 28-a upa Del Potro chuan, "Ka tan chuan tennis ka khelh hun-chhunga ka hun tawn ropui leh nuam berte zinga mi a ni. Tennis hi ka khel tawh dawn lo emaw tih turin hliam ka nei ngun a, chumi hnuah ram tan hlawhtlinna duhawm ka hlawh chhuak leh thei hi a aia hlu a awm chuang lo," a ti. Del Potro hian semifnal in-khel pawimawhah world number 2 Andy Murray hnehin Britain a lo hnawt chhuak tawh bawk.

Argentina hian tun hmain Davis Cup final hi vawi li an lo khel tawh a, an chak lo vek. A vawi nga nana an final khelhah hian hnehna chan duhin an tuihal hle. South America aṭangin a hmuna inkhel en tur hian mi 1,500 chuang an kal - an zingah hian football legend Diego Maradona pawh a tel a ni.

Davis Cup final result: Croatia 2-3 Argentina

Zirtawpni : Marin Cilic (Cro) beat Federico Delbonis (Arg) 6-3 7-5 3-6 1-6 6-2

Juan Martin del Potro (Arg) beat Ivo Karlovic (Cro) 6-4 6-7 (6-8) 6-3 7-5

Inrinni : Marin Cilic & Ivan Dodig (Cro) beat Juan Martin del Potro & Leonardo

Mayer (Arg) 7-6 (7-2) 7-6 (7-4) 6-3

Pathianni : Juan Martin del Potro (Arg) beat Marin Cilic (Cro) 6-7 (4-7) 2-6 7-5 6-4 6-3

Federico Delbonis (Arg) beat Ivo Karlovic (Cro) 6-3 6-4 6-2