El Clasico khel tur Barca an tawlhthlu

Pathianni zan La Liga inkhelah Barcelona-in chak result an hlawh chhuak zo lo a, Real Sociedad nen 1-1 in an inhnehtawk - mak angreng tak chu Barca hian kum 2007 hnuah Sociedad khelmualah chak hmel an hmu la hmu miah lo! League match khela an len hnuhnung paliah phei chuan a tlawm zawkah an ṭang a ni.

Anoeta Stadium-a an match hnuhnung pariata chak hmel hmu zo tawh lo Barca hian December 3 zanah El Clasico an khel dawn a, an hmachhawn tur hmahruaitu Real Madrid chu point ruk laiin an phak lo tawh - match hnuhnung bera chak lo chunga El Clasico hmachhawn hi an ṭawngṭai chhanna a ni lo tawp ang.

Beisei phak lo

Barcelona-in beisei an phak lo a, goal khung hmasatu chu mualneitu Real Sociedad an ni. First half-a goal a luh loh hnuah chawlhlawk hman a nih aṭanga minute riat lekah Brazilian striker Willian Jose chuan goal hmahruai a khung. Sociedad hlim au thawm pawh a reh fel hmain Barcelona-in an nawr let vat a, Lionel Messi chuan an si phurh sutna goal a khung.

Player te theihna leh thiam-na enin Catalan club hi tho leh tur angin lang hman mah se inkhel thununtu chu Real Socie-dad zawk an ni. La Real (Sociedad sawina) hi chak thei din-hmunah an ding a, Carlos Vela-a'n crossbar a pet per aṭanga ball lokal let chu Spanish forward Juanmi-a'n goal khung nan hmang mah se dik lo takin 'offside' phar sak an ni a, Barca an vannei.

Southampton forward hlui Juanmi goal khung pawm a nih loh hnuah Arsenal forward hlui Vela bawkin hun ṭha a neih chhunzawm a, mah se Mexican striker hian hun tawp nan minute ruk chauh a awm tawh tiha a hun ṭha neih chu yard 20 vela hla aṭangin post pet per nan a hmang. Goal dang lut loin hun tawp hamrik ham a ni a, Catalan club-in 47% ball chang chungin inkhel hun tawp an khar - tun season-ah an khingpui aia ball an chan tlem zawk vawi khatna a ni.

Enrique thukhawchang

Barcelona coach Luis Enrique chuan, "Kan result kha kan thlirkir a nih chuan kan vannei zawk a ni. 1-1 a inkhel a tawp thei kha thil mak a ni hial zawk a, chak zawk ni ila chuan Sociedad tan a fair lo lutuk ang. Mumal takin ball kan in pass hleithei lo a, ball kan hloh apiangin kan buai nghal em em ringawt zel a ni," tiin a naute khelh danah a lungawi lo hle.

Spanish manager chuan sawi chhunzawmin, "Second half-ah khan hmasawnna hmuh tur a awm a, mah se lungawina tur erawh a ni lo. Point khat nena Barcelona-a kir pawh hi kan phu lo a ni," a ti.

Atletico an chak

Madrid Derby-a Real hneh lo hlim Atletico Madrid-in league match hnuhnung pahniha chak hmel an hmuh zawh loh hnuah hnehna an chang ve leh ta a, Osasuna chu 3-0 in an sawp.

Pathianni kha Atletico coach Diego Simeone-a te chhungkaw tan chuan ni duhawm bik a ni - Argentine coach in a team te hnehna a chanpui zanah hian a fapa Giovanni Simeone chuan Genoa tan goal hnih khungin Ju-ven-tus 3-1 in an hneh ve bawk.

Atletico keeper Jan Oblak chuan Roberto Torres penalty pet a dan hnuah Diego Godin-a'n Atletico tan minute 36-naah goal hmahruai a khung a, Kevin Gameiro leh Yannick Carrasco te chuan goal khat ve ve khung ve lehin an team hi hnehna an chanpui ta a ni.

Simeone thukhawchang

Atletico coach Simeone chuan, "Osasuna khan inkhel
ṭantir lam minute 20 kha bul an ṭan ṭha em em mai a, Oblak-a'n penalty a dan avang leh Godin-a'n goal a khung vat avang khan kan vannei ta a ni. Ka lawmna em em chu goal thum kan khung a, hnehna kan chang bawk kha a ni. La Liga-ah hnehna chan ngei kan mamawh a, mikhual nih harsatna hmunah chu kan mamawh chu kan hlen chhuak a ni," tiin a hlim hle.

Simeone chuan sawi chhun-zawmin, "Hnehna chan hi ngaiah kan nei hman a, mah se match hnih a zawna kan tlawm khan min beng harh a ni. Hnehna kan chan zawh loh laiin rilru dik tak kan pu a, kan hmabakah eng nge inchhawp tih hi kan hrechiang em em a ni. Tun dinhmunah chuan kan rilru a hlim a, chu chu kan mamawh ber chu a ni," tiin hnehna chang zel tur chuan a player-te an phur a pawimawh thu a sawi.