Juventus ngam loh Simeone!

Parthianni zan Italian Serie A inkhelah champion lai Juventus chu Genoa lakah 3-1 in an tlawm. Italian champion-in an ngam loh chu Giovanni Simeone a ni.

Atletico Madrid manager Diego Simeone-a fapa, kum21-a upa Giovanni hian Genoa tan ṭan aṭanga minute thum leh 13-naah goal a khung a, defender Alex Sandro chuan an lamah ti lutin Juve tan hun tawp dawna Miralem Pjanic goal khungin awmzia a nei tawh lo.

Kum 2004 khan Juve hi Lecce lakah 4-3 in an lo tlawm tawh a, hemi hnuah tun ṭum hi Serie A match bikah first half-a goal thum an chhuah lehna hmasa ber a ni. A zawna league nomawi vawi nga chawi thei Juve hian point 33 hmuin hma an la hruai chhunzawm tho - AC Milan chuan point liin an la phak lo.

Alves a hliam

Juventus defender Dani Alves chu minute 77-naah midfielder Lucas Ocampos-a'n a ke vei lam a pet nat sak avangin zawn chhuah a ngai. Defender Leonardo Bonucci chu malpuina vangin first half-ah lakchhuah a lo ngai tawh bawk a, Juve hian substitution an hman theih pathum an lo hman zawh tawh avangin player 10-in an khel tluan.

Kum 33-a upa Alves hliam hi a tirah chuan na tak niin a lang a, mah se Brazil international hian a hliam chu internet lama ke ruh tliak na tak tia an tarlan ang em em kha chuan a nasat loh thu a sawi.

Alves chuan, "Football kan khelh avangin hetiang hliam hi chu thleng thei a ni. Min tawrhpuina leh dam leh thuai tura min duhsakna thu tam tak ka dawn avangin ka lawm. Ka sawi duh pakhat chu miin an sawi nasat ang em em chuan ka hliam hi a nasa lo a, ka lo let leh thuai theih ka beisei," tiin Instagram-ah a tarlang.

Brazil tana match 100 khel tling tawh Alves hian nipui lai khan Barcelona aṭangin Juventus hi a zawm a, Turin club tan hian league match riat khel tawhin goal hnih a khung tawh.