Sameer a vanduai

Hong Kong Open Super Series badminton tournament khelh zawh takah Indian shuttler Sameer Verma chuan final lut mah se champion nomawi a chawi zo lo.

Pathiannia final khelhah Sameer hi khawtual tlangval Ng Ka Long Angus lakah minute 50 chhungin 14-21, 21-10, 11-21 in a tlawm a, hmeichhe final-ah PV Sindhu chu minute 41 chhungin Tai Tzu Ying lakah 15-21, 17-21 in a tlawm ve bawk.

Kum 24-a upa Sameer chuan, "Inelna lianah final ka vawi khat khelhna a ni a, inkhelh hma kha chuan zam lo mah ila court chhungah chuan boruak a dang hle," tiin a sawi. India shuttler hian semifinal-ah world number 3 Jan O Jorgensen a hneh theih avangin nakin zelah pawh player langsar a hneh chhunzawm theih a beisei thu a sawi tel bawk.