Delhi-in Goa an sawp

Pathianni zan khan Delhi Dynamos chuan 5-1 in FC Goa an sawp a, Gianluca Zambrotta naute tan Indian Super League semifinal chu chiang tawh tluk a ni. Jawaharlal Nehru Stadium, New Delhi-a inkhelah Fulganco Cardozo chuan mikhual Goa tan minute 31-na lekah goal hmahruai a khung a, Delhi chhaih kawlhna goal mai a ni.

Goal an chhuah hnu lawkah Dynamos ben harhin an awm a, Marcelinho chuan goal an chhuah aṭanga minute sarih hnu lawkah an si phurh sutna goal a khung. Second half chu Marcelinho show a ni. Brazilian winger hian chawlhlawk hman zawh a nih aṭanga minute thum lekah an goal hnihna a khung leh a, minute 51-naah Richard Gadze thun tur a siamsak bawk - Marcelinho-a'n a la duhtawk mai lo, minute 56-naah hattrick siamin Ghanaian striker Gadze chuan an chak nemngheh nan goal khat dang khung ve lehin Delhi an chak chiang hle.

Delhi coach Gianluca Zambrotta chuan, "Semifinal ban phak thuak tawh mah ila, kan la lut lo. Match pahnih khelh tur kan la nei a, a hmasa zawkah team tum hautak NorthEast United kan hmachhawn dawn bawk avangin fimkhur a ṭul takzet a ni," tiin chawl thei an la nih loh thu a sawi.