Arsenal mawina Alexis Sanchez

Alexis Sanchez-a goal hnih hmangin Arsenal chuan Bournemouth 3-1 in an hneh. Arsene Wenger-a naute hian point 28 hmuin Premier League table-ah palina an nih chhunzawm a, hmahruaitu Chelsea nen an inthlauhna chu point thum chiah a ni.

Inrinni zanah Chelsea, Liverpool leh Manchester City ten hnehna an chan vek avangin Pathianni zana inkhel Gunners tan chak loh a thiang tawh lo a, a zawna match thum chhung an khingpuite an inhnehtawkpui hnuah chak ni hmel an hmu ve leh ta.

Laipui a puak!

Emirates Stadium-a hming langsar hmasa ber chu Steve Cook a ni. Bournemouth defender Cook hi Arsenal player hriam ber Sanchez bulah a che sual - a backpass sual dawngtu Chile international hian nuamsa leh cool takin minute 12-na lekah an goal hmahruai a khung.

Bournemouth an buai chhun-zawm duh bik lo. Minute 23-naah Callum Wilson chuan penalty aṭangin an si phurh a sut nghal. Defender Adam Smith ball tauh chu goal hrulah a kal bakah Brad Smith-a shot ṭha zet zu Gunners keeper Petr Cech-a'n a dan sak - Arsenal an him hram.

Second half-ah Arsenal an insiamṭha a, playmaker Mesut Ozil hnen aṭanga a ball hmuh chu Sanchez-a'n goal bar a pet per. Penalty chawitu Monreal chuan a tihsual thup mawina neiin Theo Walcott goal khung tur a siam sak. Spain international hian hand ball vanga penalty a chawi nawn lo chu referee Mike Jones lakah a lawm hle ang.

Tun season-a a vawi khat nan Mathieu Debuchy chu in-khel bul ṭantir ni mah se malpui na vangin thlak a ngai a, hun tawp dawnah Olivier Giroud leh Aaron Ramsey te an rawn tlan lut bawk. France international striker Giroud hian Sanchez goal hnihna a siamsak.

Arsenal an tluang

September thla tawp lam khan Wenger chuan October leh November thla chu an tan fixture a hautak thu a sawi lawk. Hemi chhung hian Gunners hian Premier League-ah Tottenham, Manchester United, Sunderland, Burnley FC, Swansea City leh Bournemouth te an hmachhawn a, chak loh an nei miah lo. League bakah hian Champions League group match-ah French Ligue 1 champion Paris Saint-Germain nen 2-2 in an inhnehtawk bawk.

Wenger-a naute hian season
ṭan niah Liverpool hneh lo mah se hemi hnuah inelna hrang hrangah match 19 an khel leh tawh a, chak loh an nei lo. Champions League-ah 1ast 16 an lut chiang tawh a, Nilaini zan dar 1:15 hian League Cup quarter final khel turin Southampton an lo mikhual leh ang.

Eng nge an sawi?

Arsenal manager Wenger chuan, "Bournemouth khan an khel ṭha hle a, hnehna kan chan theih chhan chu second half-a kan insiam ṭhat vang kha a ni. A zawna match thum chhung kan khingpuite kan draw avangin kan chungah zawhna a tam a, a chhanna chu khelmual chhungah kan lantir," a ti.

Wenger chuan a player in-hliam chungchang sawi chhunzawmin, "MRI scan kan nei anga, chumi hnuah a dinhmun a chiang ang. Bournemouth a hmachhawn hma khan Under23 team-ah minute 70 chhung harsatna nei loin a inkhel thei tawh a, a hliam hi pawi ka tiin a dam leh thuai ka beisei," tiin a sawi.

Bournemouth manager Eddie Howe chuan, "Team
ṭha tak kan nih zia kan lantir leh a, minute hnuhnung ber a rik thleng khan draw tura beiseina kan la nei. Penaty vawi hnih kan hmuh turah vawi khat chiah pek kan ni a, kan hun ṭha pakhat zawk tur kha min pe nise thil a danglam ang," tiin penalty vawi hnih hlawh turah a inngai.

Ngaihnawm

• Callum Wilson-a goal khung kha Bournemouth-in Arsenal laka an goal khung hmasa ber a ni.

• Gunners hian Premier League bika a vawi khat nan a zawnin pe-nalty aṭangin goal an chhuah.

• Arsenal hian inelna hrang hranga an match hnuhnung paliah an khingpuite goal zawnah vawi sarih an pet a, a goal vek.

• Tun season-ah Arsenal hi an khingpuite lama ball tauhlut hnem ber dawt an ni, goal ruk tauh lutin Crystal Palace (8 goals) chiah an tluk lo.