Khawvel ngaihven El Clasico

December 3 zan a ni ang a, khaw-velin Nou Camp lam a hawi ṭhup ang - Barcelona-in an hmelma kumhlun Real Madrid an hmachhawn dawn tlat! Thawhṭanni zing khan Barca coach Luis Enrique chuan training hma minute 15 chhungin 'meeting hmanhmawh' a ko a, a naute hnena a thusawi chu, "Insiamṭhat kan ngai a, fiamthu thawh hun pawh a ni tawh lo," tih hi a ni. Club training ground-ah fiamthu thawh a phal tawh lo - an hmaa ding tur hi Real Madrid an ni miau a!

Hman ata inhuatna

Team pahnih inhuatna hi khelmual chhungah mai a ni lo. Barcelona hi Spain sorkar hnuaia autonomous community Catalonia khawpui a ni a, Catalan mipuite hi Spain laka in lak hran duh niin Madrid hi Spain khawpui a ni - khelmual pawn inhuatna khelmualah seng luh a ni a, a tawp mai dawn lo.

Real Madrid leh Barcelona intawn hmasak ber chu kum 1916 Copa del Rey semi final-ah a ni a, vawi li an inhmachhawn. Match hnuhnung berah hian Real Madrid chuan offside ni ngeia ngaih hmangin goal an khung a, Barca fan-te thinrimin Real player-te hi lungin an vawm - club pahnih inhuatna tak tak chu an match hmasa ber aṭang hian a inṭan.

Transfer buaina

Kum 1950 chho khan Real Madrid legend ni ta Alfredo Di Stefano chu Spanish club pahnih hian lakluh tumin an hel a, buaina tam tak karah FIFA aiawh Munoz Calero inrawlhin club pahnih chu Di Stefano insem turin a ti - Spain-ah kum li a cham ang a, club pahnih hian kum hnih ve ve an kawl ang. Barcelona an inhnukdawk a, Di Stefano-a'n Barca a hmachhawn hmasak berah goal hnih khungin Real chu European Cup-ah vawi nga a champion pui - Barca tan na tak a ni.

Kum 2000 khan Real Madrid presidential candidate Florentino Perez chuan president-a a tling a nih chuan Luis Figo chuan Barca aṭangin Real-a pan ang tiin pound maktaduai 2.01-in a intiam tih a sawi a, Portuguese legend hian a thutiam a hlen loh chuan pound maktaduai 24.14 a chawi thung ang. Figo hian he thu hi phain, "Perez a tling emaw, tling lo emaw, Real ka pan lo ang, hetiang intiamkamna ziak turin ka mawl lo," a ti a, a ṭhian Luis Enrique leh Pep Guardiola hnenah Nou Camp-a chhuahsan loh tur thu a sawi bawk.

Mahse, Figo-a'n dawt a sawi. Perez-a tling a, contract a lo ziak ngei si. Barca tan Figo chelh tur chuan Perez hnena pound maktaduai 24.4 pek a ṭul a, an player neihsa chelh nana a hunlaia khawvel player manto 5-na ni tura heti zat sum sen hi Barca tan tih chi a ni lo. Barca president Joan Gaspart chuan, "Figo hian duh pahnih a nei a, Barca-a cham a, hausak belh bawk a ni," tiin a sawi a, Real lamah Figo a chhuak.

Barca fan-ten Figo an ngaidam lo. Real kawr haa Nou Camp-a pan hmasak berah 'Phatsantu' 'Bawlhhlawh' 'Duham' tihte kengin Figo an lo lawm a, pawisa lem an vawr chuai chuai bawk.

A thar leh ṭhin

Kum 2005 chhoah Ronaldinho-a'n a thiamna hmangin player manto rual awm khawmna Real Madrid a sawisa
ṭhin a, Real-in Barca an elphak meuh lo - tunah erawh Madrid-in BBC Gareth Bale, Karim Benzema leh Cristiano Ronaldo an nei a, Barcelona-in MSN Lionel Messi, Luis Suarez leh Neymar an nei thung - team pahnih player avang ringawt pawh hian an inkara inelna hi a nung thar hle.

Barcelona coach Luis Enrique hi Real Madrid leh Barca tana khel kawp thei player tlemte zinga mi a ni a, Real tan season nga a khelh hnuah kum 1996 khan free transfer-in Barca a zawm a, club captain hial nih chhunzawmin tunah chuan manager hial a ni ta - Real fan-ten an huatdan hi sawi fiah chi a ni lo.

Real Madrid coach Zinedine Zidane hi Real fan-te ngaihzawn rawn a ni a, club legend a ni - a thinlungah Barca aia football club huat a nei kher lo ang. Kum 2003 khan player an nih laiin Zidane leh Enrique hi El Clasico-ah an lo inhmachhawn tawh a, player pahnih hi intibuaiin Zidane-a'n kut a thawh hial - Inrinni zan inkhel a 'hot' dawn.