Inter Milan-in hmalam an pan
Serie A club talbuai Inter Milan chuan Thawhṭanni zan khan Fiorentina 4-2 in an hneh. Coach thar Stefano Pioli chuan a vawi khat nan league-ah a club hnehna a chan pui ta a, point 21 hmuin table-ah pariatnaah an inhlangkai.
San Siro-a inkhelah Inter hian bul an ṭan ṭha hle a, minute thumna lekah Marcelo Brozovic chuan goal hmahruai khungin Antonio Candreva (9') chuan a chhunzawm nghal. Captain Mauro Icardi chuan minute 18-naah an goal thumna khungin Fiorentina tan beisei tur a awm tawh loa ngaih a ni. Fiorentina an beidawng duh bik lo, Nikola Kalinic leh Josip Ilicic ten goal khungin an siphurh an sut ṭhen. Mahse, Inter tan Icardi bawkin hun tawp hma chiaha goal khung lehin an chak a nemnghet.
Kum 23-a upa Icardi hian a mimal lehkhabu ziah vangin Inter fan-te lawm hlawh lo mah se goal khung a chawlhsan chuang lo. Argentina international hian San Siro bika a league match hnuhnung pathumah goal ruk ngawt a khung.
Inter hian Serie A match bikah hian inkhel ṭantir lamah goal an khung tam ngai lo hle. Kum 1990 khan Bologna nen an inhmachhawn ṭumin ṭan aṭanga minute 19 chhungin goal thum an khung tawh a, hemi hnuah tun ṭum chiah hi minute 20 hma lama goal thum an khung leh theih hmasa ber a ni.
Inter coach Pioli chuan, "Inpumkhat-na ka sawi ṭhin a, vawiinah khan a takin kan hmu. A tir aṭanga tawp thleng khan kan thawkho ṭha em em a, goal kan khung hma avangin thil engkim kha a awlsam tawh. Duhthusam erawh a la ni lo a, kan thawkrim chhunzawm zel ang," tiin a sawi.
Goal hnih khungtu Icardi chuan, "Kan team-ah hian Serie A player ṭha tak tak an awmkhawm a, hetiang result nei thei tur hi chu kan ni," a ti. Inter hian season tirah beisei an phak loh avangin Frank De Boer banin Pioli an lalut a, an manager hnuaiah league match hnih khel tawhin chak loh an nei lo.
Thawhṭanni zan inkhel dangah Napoli chu an mikhual Sassuolo nen 1-1 in an inhnehtawk bawk. Serie A match 14 khelh tawh aṭangin Juventus chuan point 33 hmui hma an hruai chhunzawm zel a, an mahni hnaih bertu AC Milan nen an inthlauhna chu point li a ni. Khelh zat inangah Inter Milian hian point 12 zetin Juve hi an phak lo mek.