Highlanders khelmualah Delhi Dynamos

Zanin dar 7:00 hian Delhi Dynamos chuan NorthEast United an lenchilh dawn a, team pahnih tan inkhel pawimawh a ni. Italian legend Gianluca Zambrotta enkawl Delhi hian hnehna an chang thei a nih chuan semifinal an lut chiang ang a, Higlanders tan semifinal beisei chi a ni tawh lo thung ang.

NorthEast United-in an match hnuhnung bera Chennaiyin FC an inhnehtawkpui ṭumin Lunglei rawlthar Lalrempuia Fanai chuan inkhel bul a ṭan a, bench lamah Lallianzuala Chhangte leh Jerry Mawihmingthanga te chuan hun an hmang tluan thung.

Delhi Dynamos lamah season ṭantir aṭangin Lalruatthara hmel hmuh tur a la awm lo a, Pune City laka goal khungtu Chaltlang rawlthar Malsawmzuala leh defender pawimawh Lalchhawnkima ten an match hnuhnung bera Goa an sawp ṭumin an hmel an lan lo bawk - Champhai tlangval Kim Kima hian zaninah inkhel bul a ṭan a nih pawn a mak lo ang.