Malaysian club enkawl tur Westwood

Bengaluru coach hlui Ashley Westwood chuan Malaysian Super League club Penang FA a zawm a, English manager hian Croatian coach Nenad Bacina hmun ruak luahin kum hnih chhung atan contract a ziak.

Manchester United youth sys-tem chhuak Westwood hian Europe leh Asia hmun dang aṭang pawhin sawmna a hmu nia sawi a ni a, mah se Penang FA hmun leh hma a tlawh hnuah Malaysian club zawm hi a thlang ta zawk a ni.

Kum 40-a upa manager hian Indian football-ah sulhnu ropui tak a hnutchhiah. Bengaluru FC-ah season thum a cham chhungin league nomawi vawi hnih a chawi a, league nomawi an chawi loh kumah Federation Cup a chawi bawk.

Penang team manager Zairil Khir Johari chuan, "Westwood hian season hnih chhung a zawnin AFC Cup quarterfinal-ah Bengaluru a thlenpui a, kum thum chhung lekin nomawi a chawipui nual bawk. A hlawhtlinna avang hian mite zah rawn coach a ni," tiin Portsmouth defender hlui an lalut thei chu a lawm hle.

Penang FA-ah hian East Bengal striker hlui Ranti Mar-tins a khel mek a, attacking midfiel-der Faiz Subri-a'n Pahang laka a goal khung chu FIFA Puskas award (goal of the year) ni thei tura chhawp chhuah 10 zingah a tel bawk.