Hamilton-a'n a champion loh chhan a sawi

Lewis Hamilton chuan Formula 1 nomawi a kawl lai a humhim theih loh chhan chu a mimal chet-ṭhat loh vang ni loin car engine chian loh ṭhin vang a nih thu a sawi chhuak!

Pathianni khan Abu Dhabi Grand Prix tlan a ni a, Mercedes driver Ha-mil-ton hi pakhatna a ni. Mahse, tun season chhunga an point belhkhawmah Britain tlangval hian Noco Rosberg a tluk loh avangin pahnihnaah a lungawi a ṭul.

Kuminah intlansiak 21 a awm a, heng zingah hian champion Rosberg hian vawi kua hnehna a chang a, a teammate Hamilton hian vawi 10 hnehna a chang thung. Hamilton hi podium-ah vawi 17 a lawn theih laiin Rosberg hi vawi 16 a lawn thung - Mahse, heti chung hian a champion lo!

Intlansiak tam zawkah Hamilton hi chungnung mah se an danglamna pakhat a awm. British driver hi kumin-ah engine failure vangin
ṭum thum intlansiak a tlan tluan thei lo. Hetihlaiin Rosberg hian a teammate-in harsatna a tawh ang hi a tawk miah lo a, point khawlkhawm zelin a tawpah point ngain a sang zawk ta a ni.

World champion vawi thum ni tawh Hamilton chuan, "Ka theihna zawg zawng, ka rilru leh taksa chu ka hmang kim vek. Tun season-ah ṭum thum ngawt a chhan ngai vangin intlansiak ka tlan tluan thei lo. Ka harsatna ang hi Nico lakah chuan a thleng ve lo - hei hi kan dang-lamna chu a ni," tiin a sawi.

Kum 31-a upa Ha-mil-ton chuan sawi chhun-zawmin, "Season tluan khan kan thlir chuan a tam zawkah ka tlan chak ber tih a chiang a, ka tan chuan season duhawm tak chu a ni tho. Kumina ka tlan ṭhat ang ngei hian season tharah pawh tlan chhunzawm ka tum ang," a ti.

Intlansiak hnuhnung ber Abu Dhabi Grand Prix an tlan ṭum hian Hamilton hian hnehna a chan dawn hnuah a tlan muang lui nia sawi a ni. Mercedes lam chuan an driver hi tlan chak turin hriattir mah se team thu sawi a zawm lo. Hemi chungchangah hian Mercedes chuan engtiangin nge hma an lak dawn an la sawi chiang thei rih lo.