League Cup United leh Arsenal hmabak awlsam dawn lo

Premier League-ah team ṭha an tam tawh a, tun hma zawng aiin nomawi chawi a harsa tawh zawk. Zanin dar 1:15 hian Arsenal chuan League Cup (EFL Cup) quarterfinal khel turin Southampton an lo mikhual dawn a, dar 1:30-ah Manchester United leh West Ham an inkhel bawk ang.

Club lian ngamtu

Manchester United-in quarterfinal lut turin champion lai Manchester City chu Juan Mata goal khat hmangin 1-0 in an pet chhuak. Jose Mourinho naute tan Pep Guardiola naute an hneh thei a nih chuan kawng harsa a awm lo tura ngaih a ni.

Amaherawhchu, zanina an hmachhawn tur hi West Ham an ni. Slaven Bilic a naute hian last 16-ah Chelsea 2-1 in an hneh thei. London Stadium-ah Cheikhou Kouyate leh Edimilson Fernandes ten goal an khung a, goal an chhuah hi hun tawp dawna Blues defender Gary Cahill khung a ni thung.

Last 16-ah hian Man City leh Chelsea hian an player neih ṭhat ber ber an chhawr lo a, player
ṭha chhawra chak duh United leh Hammers ten an khingpui lakah hnehna an chang - Wembley luh hma chuan tawp mai an tum lo ang tih a chiang.

Club pahnihte hi kartawp Premier League-ah khan United khelmual Old Trafford-ah an inhmachhawn a, mikhual team tana Diafra Sakho goal khung chu Zlatan Ibrahimovic-a'n a sut a, 1-1 in an inhnehtawk. League Cup quarterfinal-ah second leg khelh a la nih dawn loh avangin zaninah chuan in-hneh-tawk a awm thei dawn lo.

United tan khawvela player manto ber Paul Pogba leh Marouane Fellaini te chu hrem vangin an inlan thei dawn lo. Juventus leh Everton midfielder hlui pahnih hi tun season-ah yellow card vawi nga an hmuh tawh avangin match khat khel thei lo tura hrem an ni. Feyenoord an hneh ṭuma inhliam Michael Carrick-a'n Thawhṭanni khan training a zawm tawh thung.

Mourinho hian Pogba leh Fellaini te chhawr thei dawn lo mah se captain Wayne Rooney bakah Henrikh Mkhitaryan, Luke Shaw leh Anthony Martial te chu inkhel bulṭan thei tura ngaih an ni a, mamawh huna hman theih turin Bastian Schweinsteiger a la nei cheu bawk. German midfielder hi kartawp-a West Ham nen an inhnehtawk ṭumin bench a ṭhu tawh.

Match 20 na...?

Arsene Wenger-a enkawl Gunners hi a zawna match 19 chhung chak loh nei loa kaltluang lai an ni. Premier League-ah Tottenham leh Manchester United an inhnehtawk pui bakah Champions League lamah Paris Saint-Germain nen 2-2 in an inhnehtawk bawk - kartawp an match hnuhnung berah erawh an mikhual Bournemouth chu Alexis Sanchez goal hnih leh Theo Walcott-a goal khat hmangin 3-1 in an hneh.

Premier League club zingah European competition-a inlan phak chinte chu League Cup-ah hian third round aṭang chauhin an inlan. Arsenal hian third round-ah Nottingham Forest 4-0 a an sawp bakah last 16-ah Reading chu 2-0 in an hneh bawk - goal an la chhuah miah lo.

An khingpui tur Southamp-ton pawh an result a duhawm hle. Crystal Palace leh Sunder-land te hneh tawhin an lamah goal a la lut bik lo. Saints hian Europa League match khat leh league match hnihah hnehna an chan zawh loh hnuin kartawp khan an tiatpui Everton chu 1-0 in an hneh.

Arsenal khelmualah bik Gunners leh Saints hi vawi 41 an inhmachhawn tawh a, Arsenal hian vawi 25 hnehna changin vawi 13 chu an inhnehtawk - Saints hian ṭum thum chiah hnehna an chang. Emirates Stadium-a an intawn hnuhnung ber chu September thla kha niin mualneitu hi 2-1 in an chak.

Saints manager Claude Puel chuan a player manto ber Sofiane Boufal chu a dinhmun a la sawi chiang thei lo. Boufal hian hliam vangin Everton a hmachhawn thei lo, ani bakah hian damlohna vanga an match hnuhnung ber khel lo Steven Davis dinhmun a chiang lo bawk.

Wenger-a naute zingah Mathieu Debuchy tih loh chu hliam thar lam an awm lo. French manager hian a tih ṭhin dan ngaiin round hmasa lamah a player naupang leh league lama a chhawr rim loh ho tan khelhna hun a siamsak. Zanina an hmachhawn tur leh round hmasa lam an tumte aia team ṭha leh khawng zawk an nih avangin semifinal lut tur erawh chuan a player ṭha ṭhenkhat a chhawr a ṭul ang.