Thlawhtheihna chesualah Brazilian footballer 19-in nunna an chan

Brazil football club Chapecoense player 22 chuanna thlawhtheihna chu nimin khan Colombia khawpui Medellin a panna lamah a chesual a, mi 81 chuang zingah mi 76-in nunna chanin mi panga an dam chhuak.

Brazilian club Chapecoense hi South America khawmualpuia club football inelna sang ber dawttu Copa Sudamericana (Europa League tlukpui) final khel tura zin chhuak an ni a, Colombian club ṭha Atletico Nacional hmachhawn tura zin niin vanduaina hi an tawk ta a ni.

South American Football Confederation (CONMEBOL) chuan he chhiatna rapthlak thlen hnu lawkah hian an pawl hnuaia inelna awm zawng zawngte chu tihtawp rih vek a nih thu an sawi.

Chapecoense chuan thuchhuah siam nghalin, "Pathianin kan player-te, official, journalist leh thlawhtheihnaa chuang ve zawng zawng te awmpui rawh se," an ti a, thuchiang zawk an ngaihchan mek thu an sawi bawk.

Club vice president Ivan Tozzo chuan, "Kan khaw mipuite chu an mittui a hul thei lo a, Chapecoense hi he khua hlimna leh lawmna ber a ni ṭhin a, vawiin thil thleng ang hi kan lo suangtuah ngai lo," a ti.

Thlawhtheihna chesuala dam chhuak zingah hian Chapecoense player pathum an tel a, defender Alan Ruschel, goalkeeper pahnih Jackson Follman leh Danilo an dam chhuak. Club physiotherapist Rafael Gobbato bakah passenger zinga mi Ximena Suarez chu a dam chhuak bawk.

Sports chanchinthar puangtu Telemundo Deportes chuan dam chhuak zinga mi defender Ruschel chu harh chhuak mah se a la chiai thu an sawi a, a kuta inneih zungbun a bun chu phelh sak lo tur leh a chhungte hmuh a duh thu a sawi a ni, an ti.

Britain kut chhuak thlawh-theihna, Bolivian charter airline Lamia enkawlna hnuaia thlawk hian passenger 72 phurin, pakaw dang hi thlawhtheihna hnathawk an ni. An chetsual hun hi India sanaa nimin chawhma dar 10:30 vel niin pilot-in electric lamah buaina a awm thu a sawi hnu lawkah chetsualna hi a thleng.

Chanchinthar langsar

• Thlawhtheihna hian mi 81 an phur a, a chetsualna hmun hi Cerro Gordo, Colombia a ni.

• Brazilian football club Chapecoense player 22 a phur

• Electric buaina avangin ground controller te nen an inbe chhunzawm thei lo a, ṭum a tumna lamah a chesual ta a ni.

• Thlawhtheihna hi Bolivia aṭanga Medellin airport pan a ni.

• Khaw chhia avangin chhanchhuah hna duh angin thawh theih a ni lo.

• Medellin mayor chuan 'chhiatna rapthlak tak a ni' tiin an chhiat tawh chungchang a sawi.

Tawrhpuina

• Brazil president Michel Temer chuan, "Brazilian chhungkaw tam takin lungngaihna an tawh niah hian ka tawrhpui takzet a, kil tin aṭangin kan theihna zawng zawng nen ṭanpuina kan kalpui mek a ni," a ti.

• Spanish goalkeeper Iker Casillas chuan, "Chapecoense player-te chuanna thlawhtheihna a chesual hi pawi ka ti takzet a, football tan vawiin hi hun rapthlak tak a ni. Inti chak ula, huai takin awm rawh u," a ti.

• Spanish club Barcelona chuan, "He chhiatnain a nghawng Chapecoense chhungkua kan tawrhpui takzet a ni," tiin twitter lamah an tarlang.

• Atlético Madrid chuan, "Nunna chan ta te kan tawrhpui takzet a, thlamuang takin chawl rawh se," an ti.

Chapecoense football team

• Kum 1973 khan din a ni

• Kum 2014 khan an club chanchina a vawi khat nan Brazil-a league sang ber Serie A an inpetkai.

• Copa Sudamericana final first leg khel tura zin chhuak an ni.

• Season hmasa Cope Libertadores (Champions League) champion Atletico Nacional an hmachhawn dawn avangin rinkai loh zawk an ni.

• Santa Catarina State-a Chapeco khawpuia innghat an ni.

• Brazilian club zinga hausa 21-na an ni a, an club hlutna hi pound maktaduai 10.9 a ni.