Coutinho a chawl rei dawn

Sunderland an hneh ṭuma in-hliam Liverpool forward Philippe Coutinho chu Thawhṭan-ni khan a hliam endik a ni a, Brazil inter-national hi January thla laihawl thleng chu a chawlh ngai tura ngaih a ni.

Kum 24-a upa Coutinho hi Didier Ndong nen ball an inchuhna lamah a inhliam a, a hliam hi scan ni tawhin a result dik tak hi hriat theih la ni lo mah se a hliam hi a kerekah a nih avangin kar nga aṭang-a kar ruk tal chawl turah an ngai.

Liverpool-in Premier League nomawi an beiseina kawngah Coutinho hi player pawimawh pawl a ni a, league match-a goal nga khunga assist vawi ruk nei tawh tel loa Reds dinhmun tur hi hriat a chakawm hle - Brazilian midfielder tel lo hian Merseyside Derby-ah Everton an hmachhawn ang a, Manchester City chu December 31 zanah an mikhual bawk ang.

Jurgen Klopp-a'n January-ah Sadio Mane a chhawr thei dawn lo bawk a, nipui bazar laia pound maktaduai 34-a a lei Senegalese forward hi Africa Cup of Nations khel turin ram tan a fehchhuah a ṭul dawn.

Reds tlarhmaah Daniel Sturridge leh Roberto Firmino an inhliam bawk a, striker pahnih hi nizan EFL Cup an khelh hmain Klopp-a'n a la chhawr theih loh tur thu a sawi a, an inkhel result erawh kan hre hman lo thung.

Liverpool tana chanchin lawmawm erawh England tan a feh chhuahna lama inhliam Adam Lallana a dam leh ṭan tawh a, English midfielder hian Liverpool fitness coach-te enkawlna hnuaiah training a nei leh tawh.